കാസർകോട് / റിയാദ്: ഈ വർഷത്തെ ഹജ്ജ് കർമ്മങ്ങളിൽ പങ്കെടുക്കുന്നതിനിടെയുണ്ടായ ശാരീരിക അസ്വസ്ഥതകളെ തുടർന്ന് കാസർകോട് സ്വദേശിനി ഉൾപ്പെടെ മൂന്ന് മലയാളി തീർത്ഥാടകർ മക്കയിൽ അന്തരിച്ചു. കാസർകോട് പൈവളിക കയർക്കട്ടെ പഴയ കൃഷിഭവന് സമീപം താമസിക്കുന്ന കുഞ്ഞലിമ്മ (63) ആണ് മക്കയിൽ മരണമടഞ്ഞ കാസർകോട്ടെ തീർത്ഥാടക. പാലക്കാട്, എറണാകുളം സ്വദേശിനികളായ മറ്റ് രണ്ട് വനിതകളും മക്കയിൽ വെച്ച് മരണപ്പെട്ടിട്ടുണ്ട്.
ഹജ്ജ് കർമ്മങ്ങൾക്കിടയിൽ മിനയിൽ വെച്ചാണ് കുഞ്ഞലിമ്മയ്ക്ക് പെട്ടെന്ന് ശാരീരിക അസ്വസ്ഥതകൾ അനുഭവപ്പെട്ടത്. തുടർന്ന് ഇവരെ ഉടൻ തന്നെ മക്കയിലെ സൗദി ജർമൻ ആശുപത്രിയിൽ പ്രവേശിപ്പിച്ചു. തീവ്രപരിചരണ വിഭാഗത്തിൽ വിദഗ്ധ ചികിത്സയിൽ കഴിയവെയായിരുന്നു അന്ത്യം സംഭവിച്ചത്. സൗദി അധികൃതരുടെ നേരിട്ടുള്ള മേൽനോട്ടത്തിൽ ഇവർക്കായുള്ള മരണാനന്തര നടപടിക്രമങ്ങളും മറ്റ് ഔദ്യോഗിക കർമ്മങ്ങളും മക്കയിൽ പുരോഗമിക്കുകയാണെന്ന് ബന്ധപ്പെട്ടവർ അറിയിച്ചു.
മറ്റ് രണ്ട് മലയാളികളും ഹജ്ജ് ചടങ്ങുകൾക്കിടയിലും അതിന് തൊട്ടുപിന്നാലെയുമാണ് മരണത്തിന് കീഴടങ്ങിയത്. പാലക്കാട് കൊപ്പം പഞ്ചായത്ത് അൻസാർ നഗർ തെക്കുമല മർക്കശ്ശേരി വീട്ടിൽ സുലൈമാന്റെ ഭാര്യ പാത്തുമ്മ (58) മിനയിലെ ആശുപത്രിയിലും, ഹജ്ജ് കർമ്മങ്ങൾ പൂർത്തിയാക്കിയതിന് തൊട്ടുപിന്നാലെ അസുഖബാധിതയായ എറണാകുളം ഇടവനക്കാട് സ്വദേശിനി സുലൈഖ (70) മക്കയിലെ സൗദി നാഷനൽ ആശുപത്രിയിലുമാണ് അന്തരിച്ചത്.
തീർത്ഥാടകരുടെ വിയോഗത്തിൽ ഹജ്ജ് മിഷൻ ഭാരവാഹികളും പ്രവാസി സംഘടനകളും അനുശോചനം രേഖപ്പെടുത്തി.
Leave a Reply