കാസർകോട്: കാഞ്ഞങ്ങാട്ടെ പ്രമുഖ അന്തർസംസ്ഥാന കുറ്റവാളി ‘ലാലാ കബീർ’ എന്ന അഹമ്മദ് കബീറും കൂട്ടാളിയും കഞ്ചാവ് കടത്തുന്നതിനിടെ കുമ്പളയിൽ വെച്ച് നാടകീയമായി പിടിയിലായി. നിരവധി കേസുകളിൽ പ്രതിയായ ലാലാ കബീറിനൊപ്പം കാഞ്ഞങ്ങാട് ആവിക്കര സ്വദേശി മുഹമ്മദ് മിർഷാദാണ് പോലീസിന്റെ വലയിലായത്. ഇവരിൽ നിന്ന് 31 കിലോ കഞ്ചാവും കടത്താൻ ഉപയോഗിച്ച ഹോണ്ടാ സിറ്റി കാറും പോലീസ് പിടിച്ചെടുത്തു.
മൈസൂർ ജയിലിൽ നിന്നിറങ്ങി നേരെ കഞ്ചാവ് കടത്തിലേക്ക്; നിഴലായി പിന്തുടർന്ന് പോലീസ്
കർണാടകയിലെ ഒരു കേസുമായി ബന്ധപ്പെട്ട് മൈസൂർ ജയിലിലായിരുന്ന ലാലാ കബീർ മൂന്നാഴ്ച മുമ്പാണ് പുറത്തിറങ്ങിയത്. കബീർ ജയിൽ മോചിതനായാൽ വീണ്ടും കുറ്റകൃത്യങ്ങളിൽ ഏർപ്പെടാൻ സാധ്യതയുണ്ടെന്ന നിഗമനത്തിൽ കാസർകോട് ജില്ലാ പോലീസ് ഇയാളെ കൃത്യമായി നിരീക്ഷിച്ചുവരികയായിരുന്നു.
ജയിൽ മോചിതനായ ശേഷം കബീർ കാസർകോട്ടേക്ക് വരാതെ കർണാടകയുടെ വടക്ക്-കിഴക്കൻ അതിർത്തി വഴി മാറിയെന്ന രഹസ്യവിവരം പോലീസിന് ലഭിച്ചു. തുടർന്ന് ഇയാളുടെ നീക്കങ്ങൾ നിരീക്ഷിച്ച ജില്ലാ പോലീസ് മേധാവിക്ക്, കബീർ കാർ മാർഗം കാസർകോട് കേന്ദ്രീകരിച്ച് സഞ്ചരിക്കുന്നുണ്ടെന്ന കൃത്യമായ വിവരം വെള്ളിയാഴ്ച രാത്രിയോടെ ലഭിക്കുകയായിരുന്നു.
തലപ്പാടിയിൽ നിന്നാരംഭിച്ച സിനിമാറ്റിക് ചെയ്സ്
വിവരത്തിന്റെ അടിസ്ഥാനത്തിൽ ജില്ലാ പോലീസ് മേധാവിയുടെ കീഴിലുള്ള ഡാൻസാഫ് (DANSAF) സംഘവും പോലീസും തലപ്പാടി അതിർത്തിയിൽ അതീവ ജാഗ്രതയോടെ നിലയുറപ്പിച്ചു. ശനിയാഴ്ച രാവിലെ സംശയകരമായ സാഹചര്യത്തിൽ അതിർത്തി കടന്നെത്തിയ ഹോണ്ടാ സിറ്റി കാറിന് പോലീസ് കൈകാണിച്ചെങ്കിലും നിർത്താതെ അമിതവേഗതയിൽ മുന്നോട്ട് കുതിക്കുകയായിരുന്നു.
പോലീസ് സംഘം കാറിനെ പിന്തുടർന്നെങ്കിലും പ്രതികൾ അതിവേഗത്തിൽ രക്ഷപ്പെടാൻ ശ്രമിച്ചു. ഇതോടെ പോലീസ് തന്ത്രം മാറ്റി. പ്രതികൾ കൈവിട്ടുപോകുമെന്ന ഘട്ടത്തിൽ വിവരം തൊട്ടടുത്തുള്ള കുമ്പള പോലീസിന് കൈമാറി.
ആരിക്കാടിയിൽ ഒരുക്കിയ ‘ചക്രവ്യൂഹം’; ഒടുവിൽ കീഴടങ്ങൽ
സന്ദേശം ലഭിച്ചയുടൻ കുമ്പള ഇൻസ്പെക്ടർ ബൈജു കെ. ജോസ്, എസ്.ഐ കെ.പി. ഗണേശൻ എന്നിവരുടെ നേതൃത്വത്തിലുള്ള പോലീസ് സംഘം ആരിക്കാടി ടോൾ പ്ലാസക്ക് സമീപം അതീവ സുരക്ഷാ വലയമൊരുക്കി. പോലീസ് വാഹനങ്ങൾ ഉൾപ്പെടെ നാലോളം വണ്ടികൾ ദേശീയപാതയ്ക്ക് കുറുകെയിട്ട് പോലീസ് റോഡ് പൂർണ്ണമായും ബ്ലോക്ക് ചെയ്ത് ‘ചക്രവ്യൂഹം’ തീർത്തു.
ഇതോടെ പോലീസിന്റെ കെണിയിൽ പെട്ട ലാലാ കബീറിനും കൂട്ടാളി മുഹമ്മദ് മിർഷാദിനും മുന്നോട്ട് പോകാൻ കഴിയാതെ വരികയും അവർ പോലീസിന് മുന്നിൽ കീഴടങ്ങാൻ നിർബന്ധിതരാവുകയുമായിരുന്നു. തുടർന്ന് കാറിനകത്ത് നടത്തിയ വിശദമായ പരിശോധനയിലാണ് ഒളിപ്പിച്ച നിലയിൽ 31 കിലോ കഞ്ചാവ് കണ്ടെടുത്തത്.
ലക്ഷ്യം കാഞ്ഞങ്ങാട്ടെ വിപണി; സംശയ നിഴലിൽ പോലീസ്
ഒറീസയിൽ നിന്നും വൻതോതിൽ കയറ്റിയ കഞ്ചാവ് കാഞ്ഞങ്ങാട്ടെത്തിച്ച് വിൽപന നടത്തുകയായിരുന്നു തങ്ങളുടെ ലക്ഷ്യമെന്നാണ് ലാലാ കബീർ പോലീസിന് നൽകിയ പ്രാഥമിക മൊഴി. എന്നാൽ പോലീസ് ഇത് പൂർണ്ണമായി വിശ്വാസത്തിലെടുത്തിട്ടില്ല. മറ്റാർക്കോ വേണ്ടി കഞ്ചാവ് എത്തിച്ചു കൊടുത്തതാണോ എന്ന കാര്യത്തിൽ പോലീസിന് ശക്തമായ സംശയമുണ്ട്. പ്രതികളെ വിശദമായി ചോദ്യം ചെയ്യുന്നതിലൂടെ ലഹരിക്കടത്തിന് പിന്നിലുള്ള വൻ സ്രാവുകളെ പുറത്തുകൊണ്ടുവരാൻ സാധിക്കുമെന്ന കണക്കുകൂട്ടലിലാണ് പോലീസ്.
Leave a Reply