തിരുവനന്തപുരം: സംസ്ഥാന സർക്കാരിന്റെ ‘പ്രിയദർശിനി’ സൗജന്യ യാത്രാ പദ്ധതി ആരംഭിച്ച് ഒരു മാസം പിന്നിടുമ്പോൾ ജനങ്ങൾക്കിടയിൽ വൻ സ്വീകാര്യത. എല്ലാ പ്രായത്തിലുമുള്ള സ്ത്രീകൾക്കും ട്രാൻസ്ജെൻഡേഴ്സിനും കെഎസ്ആർടിസി ഓർഡിനറി ബസുകളിൽ സൗജന്യ യാത്ര അനുവദിക്കുന്ന പദ്ധതി വലിയ വിജയമായെങ്കിലും, കെഎസ്ആർടിസിക്ക് ഇത് കനത്ത സാമ്പത്തിക ബാധ്യതയാകുന്നതായാണ് കണക്കുകൾ വ്യക്തമാക്കുന്നത്.
ഒരു മാസത്തിൽ 75 കോടിയുടെ വരുമാന നഷ്ടം
പദ്ധതി ജനങ്ങൾ ഏറ്റെടുത്തതോടെ കെഎസ്ആർടിസിയുടെ വരുമാനത്തിൽ വലിയ ഇടിവാണ് രേഖപ്പെടുത്തിയിരിക്കുന്നത്.
- ആകെ നഷ്ടം: ഒരു മാസത്തിനിടെ ഇതുവരെ 75 കോടി രൂപയുടെ നഷ്ടം.
- പ്രതിദിന നഷ്ടം: ഓരോ ദിവസവും ശരാശരി 2.5 കോടി രൂപയുടെ വരുമാന നഷ്ടം ഉണ്ടാകുന്നു.
എന്നാൽ, പദ്ധതി വഴി വനിതാ യാത്രക്കാരുടെ എണ്ണത്തിൽ 40 ശതമാനത്തിന്റെ വർദ്ധനവ് ഉണ്ടായിട്ടുണ്ട്. പ്രതിദിനം ശരാശരി 7.25 ലക്ഷം സ്ത്രീകളാണ് നിലവിൽ കെഎസ്ആർടിസിയെ ആശ്രയിക്കുന്നത്. പദ്ധതി ആരംഭിച്ച് ഇതുവരെ 1.87 കോടി സ്ത്രീകൾ ഈ സൌജന്യ യാത്രാ ആനുകൂല്യം പ്രയോജനപ്പെടുത്തിക്കഴിഞ്ഞു. കൊല്ലം, തിരുവനന്തപുരം ജില്ലകളിൽ നിന്നാണ് ഏറ്റവും കൂടുതൽ യാത്രക്കാർ ഈ പദ്ധതി ഉപയോഗിക്കുന്നത്. നിലവിൽ 3,125 ഓർഡിനറി ബസുകളാണ് പ്രിയദർശിനി പദ്ധതിക്കായി സർവീസ് നടത്തുന്നത്.
ഏഴ് ക്ലാസുകളിൽ സൗജന്യ യാത്ര
ഓർഡിനറി വിഭാഗത്തിലെ താഴെ പറയുന്ന ഏഴ് ക്ലാസുകളിലാണ് സ്ത്രീകൾക്കും ട്രാൻസ്ജെൻഡേഴ്സിനും സൌജന്യ യാത്ര ലഭ്യമാകുന്നത്:
- ഓർഡിനറി
- സിറ്റി ഓർഡിനറി
- ലിമിറ്റഡ് സ്റ്റോപ്പ് / ഓർഡിനറി
- ടൗൺ ടു ടൗൺ
- ഫെയർ സ്റ്റേജ് ലിമിറ്റഡ് സ്റ്റോപ്പ്
- പോയിന്റ് ടു പോയിന്റ് / ഓർഡിനറി
- ഗ്രാമവണ്ടി
ഗവി പ്രിയദർശിനി ബസ് തകരാർ: കെഎസ്ആർടിസി അന്വേഷണം ആരംഭിച്ചു
അതേസമയം, പ്രിയദർശിനി പദ്ധതിയുടെ ഭാഗമായി സർവീസ് നടത്തുന്ന ഗവി ബസ് തുടർച്ചയായി ബ്രേക്ക്ഡൗൺ ആകുന്നത് സംബന്ധിച്ച് കെഎസ്ആർടിസി ഉന്നതതല അന്വേഷണം ആരംഭിച്ചു. കഴിഞ്ഞ ദിവസം ഗവിയിലേക്ക് സർവീസ് നടത്തിയ ബസ് കാറ്റാടിക്കുന്നിൽ വെച്ച് വീണ്ടും ബ്രേക്ക് ഡൗൺ ആയതോടെയാണ് നടപടി.
കെഎസ്ആർടിസി സിഎംഡി നിയോഗിച്ച പ്രത്യേക വിജിലൻസ് സംഘം പത്തനംതിട്ടയിലെത്തി വിവരങ്ങൾ ശേഖരിക്കുകയും ബസുകൾ പരിശോധിക്കുകയും ചെയ്തു. അന്വേഷണ റിപ്പോർട്ട് ഉടൻ തന്നെ സിഎംഡിക്ക് കൈമാറും. ബസുകൾ തുടർച്ചയായി തകരാറിലാകുന്ന പശ്ചാത്തലത്തിൽ സുരക്ഷ മുൻനിർത്തി ഗവി ബസ്സിലെ യാത്രാക്കാരുടെ എണ്ണം നിലവിൽ 55 ആയി പരിമിതപ്പെടുത്തിയിട്ടുണ്ട്.
Leave a Reply