കാസർകോട്: ജില്ലയിൽ കടൽക്ഷോഭം അതിരൂക്ഷമായി തുടരുന്നു. കുമ്പള, ഉപ്പള മേഖലകളിലെ തീരദേശവാസികൾ വലിയ ഭീതിയിലാണ് കഴിയുന്നത്. തിരമാലകളുടെ ശക്തി കൂടിയതോടെ കടൽഭിത്തികൾ ഭൂരിഭാഗവും തകരുകയും നിരവധി വീടുകളും റോഡുകളും അപകടഭീഷണിയിലാവുകയും ചെയ്തു.
കുമ്പളയിൽ രണ്ടു കുടുംബങ്ങളെ മാറ്റിപ്പാർപ്പിച്ചു
കുമ്പള കോയിപ്പാടി കടപ്പുറത്ത് കഴിഞ്ഞ രണ്ടു ദിവസമായി ശക്തമായ കടലാക്രമണമാണ് അനുഭവപ്പെടുന്നത്. തിരമാലകൾ അടിച്ചുകയറി കടൽഭിത്തി തകർന്നതിനെ തുടർന്ന് വിമല, സവിത എന്നിവരുടെ കുടുംബങ്ങളെ ബന്ധുവീടുകളിലേക്ക് മാറ്റിപ്പാർപ്പിച്ചു.
പ്രദേശത്തെ പത്തോളം തെങ്ങുകൾ കടലെടുത്തു. കോൺക്രീറ്റ് റോഡിന്റെ അടിഭാഗത്തെ മണ്ണ് ഒലിച്ചുപോയതോടെ ഗതാഗതവും അപകടാവസ്ഥയിലാണ്. നിരവധി കുടുംബങ്ങളാണ് ഇവിടെ കടലാക്രമണ ഭീഷണി നേരിടുന്നത്.
ഉപ്പളയിൽ വീട് തകർന്നു; മറ്റ് പ്രദേശങ്ങളിലും ഭീതി
ഉപ്പള ശാരദാ നഗറിൽ കടലാക്രമണത്തിൽ ശശികല എന്നയാളുടെ വീട് പൂർണ്ണമായി തകർന്നു. ഈ പ്രദേശത്തെ കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റിയിട്ടുണ്ട്. സമീപത്തെ അഞ്ചോളം വീടുകൾ ഇപ്പോഴും തകർച്ചാഭീഷണിയിലാണ്. റോഡുകളിലേക്ക് വെള്ളം കയറി നശിക്കുകയും കടൽഭിത്തികൾ തകരുകയും ചെയ്തിട്ടുണ്ട്. സംഭവസ്ഥലം ഉന്നത ഉദ്യോഗസ്ഥർ സന്ദർശിച്ചു.
ഉപ്പളയിലെ തന്നെ മുസോടി കടപ്പുറം, ഹിദായത്ത് നഗർ, മണിമുണ്ട എന്നീ പ്രദേശങ്ങളിലും സ്ഥിതി സമാനമാണ്.
ജില്ലയിലാകെ വ്യാപക നാശനഷ്ടം
കാസർകോട് ചേരങ്കൈ കടപ്പുറം, കാവുഗോളി കടപ്പുറം എന്നിവിടങ്ങളിലും കഴിഞ്ഞ ഏതാനും ദിവസങ്ങളായി കടൽക്ഷോഭം രൂക്ഷമാണ്. ഇവിടെ പലയിടത്തും റോഡുകൾ ഒലിച്ചുപോയിട്ടുണ്ട്. പള്ളിക്കര കടപ്പുറത്തും കടലാക്രമണത്തെ തുടർന്ന് വലിയ തോതിലുള്ള നാശനഷ്ടങ്ങൾ റിപ്പോർട്ട് ചെയ്തു.
അടിയന്തര പരിഹാരമായി തകർന്ന മേഖലകളിൽ പുതിയ കടൽഭിത്തികൾ നിർമ്മിക്കണമെന്നും ദുരിതബാധിതർക്ക് ആവശ്യമായ പുനരധിവാസ സൗകര്യങ്ങൾ ഒരുക്കണമെന്നുമാണ് നാട്ടുകാരുടെ ആവശ്യം.
Leave a Reply