ട്രോളല്ല, തീയാണ്! ഇൻസ്റ്റാഗ്രാമിൽ ബിജെപിയെയും വെട്ടിച്ച് ‘കോക്രോച്ച് ജനതാ പാർട്ടി’ (CJP); ഇന്ത്യൻ യുവത്വത്തിന്റെ ഡിജിറ്റൽ പ്രക്ഷോഭം

ന്യൂഡൽഹി: ഇന്ത്യൻ സോഷ്യൽ മീഡിയയെ മൊത്തം ഉലച്ചുകൊണ്ട് ഒരു പുതിയ ഡിജിറ്റൽ പ്രസ്ഥാനം രൂപം കൊണ്ടിരിക്കുകയാണ്—കോക്രോച്ച് ജനതാ പാർട്ടി അഥവാ സിജെപി (CJP). ഇതൊരു വെറും കുട്ടിക്കളിയോ തമാശ ട്രോളോ അല്ല; മറിച്ച് സിസ്റ്റത്തിന്റെ ഉറക്കം കെടുത്തുന്ന, ഇന്ത്യൻ ജെൻസി (Gen Z) പിള്ളേർ ഏറ്റെടുത്ത ഒരു ശക്തമായ പൊളിറ്റിക്കൽ മൂവ്‌മെന്റായാണ് ഇത് അടയാളപ്പെടുത്തപ്പെടുന്നത്.

ലോഞ്ച് ചെയ്ത് വെറും നാല് ദിവസത്തിനകം ഇൻസ്റ്റാഗ്രാമിൽ 1 കോടിയിലധികം (10.1 Million) ഫോളോവേഴ്സിനെ സ്വന്തമാക്കി ഭരണകക്ഷിയായ ബിജെപിയെപ്പോലും (8.7 Million) സിജെപി പിന്നിലാക്കി കഴിഞ്ഞു.

ചീഫ് ജസ്റ്റിസിന്റെ ‘പാറ്റ’ പരാമർശവും സിജെപിയുടെ ജനനവും

സുപ്രീം കോടതിയിൽ നടന്ന ഒരു വാദത്തിനിടെ ചീഫ് ജസ്റ്റിസ് സൂര്യകാന്ത് നടത്തിയ ‘പാറ്റ’ (Cockroach) പരാമർശമാണ് സിജെപി രൂപീകരണത്തിലേക്ക് നയിച്ചത്. വ്യാജ ബിരുദങ്ങൾ കാണിച്ച് ആക്ടിവിസവും ജേണലിസവും നടത്തുന്ന ചില യുവാക്കളെ അദ്ദേഹം പാറ്റകളോടും പരജീവികളോടും (Parasites) ഉപമിച്ചിരുന്നു. തൊഴിലില്ലാത്ത ഒരു കൂട്ടം യുവാക്കളാണ് ആക്ടിവിസ്റ്റുകളായി മാറി സിസ്റ്റത്തെ ആക്രമിക്കാൻ തുടങ്ങുന്നത് എന്ന രീതിയിലായിരുന്നു അദ്ദേഹത്തിന്റെ നിരീക്ഷണം.

തൊഴിലില്ലായ്മയും പരീക്ഷാ തട്ടിപ്പുകളും (Paper Leaks) കാരണം രാജ്യം മുഴുവൻ യുവാക്കൾ ബുദ്ധിമുട്ടുമ്പോൾ, അവരെ ഒന്നടങ്കം അപമാനിക്കുന്ന രീതിയിലാണ് യുവത ഇതിനെ കണ്ടത്.

തുടക്കം ഇങ്ങനെ: മുൻ ആം ആദ്മി പാർട്ടി സോഷ്യൽ മീഡിയ സ്ട്രാറ്റജിസ്റ്റും ബോസ്റ്റൺ യൂണിവേഴ്സിറ്റിയിൽ നിന്ന് പബ്ലിക് റിലേഷൻസിൽ ഉപരിപഠനം പൂർത്തിയാക്കുകയും ചെയ്ത അഭിജിത് ദിപ്കെ (30) എന്ന യുവാവാണ് ഇതിന് പിന്നിൽ. “എങ്കിൽ എല്ലാ പാറ്റകൾക്കും ഒന്നിച്ചുകൂടേ?” എന്ന് ചോദിച്ച് 2026 മേയ് 16-ന് അദ്ദേഹം ‘Cockroach Janta Party’ എന്ന പേരിൽ പേജും വെബ്‌സൈറ്റും തുടങ്ങി.

సంഭവം വൻ വിവാദമായതോടെ ചീഫ് ജസ്റ്റിസ് വിശദീകരണവുമായി രംഗത്തെത്തി. വ്യാജ ബിരുദങ്ങൾ ഉപയോഗിച്ച് നിയമരംഗത്തും മാധ്യമരംഗത്തും എത്തുന്നവരെയാണ് താൻ ഉദ്ദേശിച്ചതെന്നും രാജ്യത്തെ യുവാക്കളെ അപമാനിക്കാൻ ശ്രമിച്ചിട്ടില്ലെന്നും അദ്ദേഹം വ്യക്തമാക്കി. എന്നാൽ യുവാക്കൾ ഈ പ്രസ്ഥാനവുമായി മുന്നോട്ട് പോവുകയായിരുന്നു.

5 പോയിന്റ് അജണ്ട: സിജെപിയുടെ പ്രധാന ആവശ്യങ്ങൾ

വെറുമൊരു സോഷ്യൽ മീഡിയ ഹൈപ്പ് മാത്രമല്ല, കൃത്യമായ ഡിമാൻഡുകളോടെയാണ് ഇവർ അജണ്ടകൾ മുന്നോട്ട് വെച്ചിരിക്കുന്നത്.

ജഡ്ജിമാർക്ക് റിട്ടയർമെന്റ് ആനുകൂല്യങ്ങൾ ഇല്ല: ഒരു ചീഫ് ജസ്റ്റിസിനും വിരമിച്ച ശേഷം രാജ്യസഭാ സീറ്റോ മറ്റ് രാഷ്ട്രീയ പദവികളോ റിട്ടയർമെന്റ് റിവാർഡായി നൽകരുത്.
വോട്ടിംഗ് അവകാശം സംരക്ഷിക്കുക: ജനങ്ങളുടെ വോട്ട് അന്യായമായി റദ്ദാക്കുകയോ ഇല്ലാതാക്കുകയോ ചെയ്താൽ ചീഫ് ഇലക്ഷൻ കമ്മീഷണറെ UAPA നിയമപ്രകാരം അറസ്റ്റ് ചെയ്യണം.
സ്ത്രീകൾക്ക് 50% സംവരണം: പാർലമെന്റിലും എല്ലാ ക്യാബിനറ്റ് പദവികളിലും സ്ത്രീകൾക്ക് കൃത്യമായി 50% സീറ്റുകൾ ഉറപ്പാക്കുക. നിലവിലുള്ള സീറ്റുകളുടെ എണ്ണം വർദ്ധിപ്പിക്കാതെ തന്നെ ആനുപാതം ഉയർത്തിക്കൊണ്ടു വരണം.
മാധ്യമ അന്വേഷണം: ‘ഗോദി മീഡിയ’ ആങ്കർമാരുടെ സാമ്പത്തിക ഇടപാടുകളിൽ കൃത്യമായ അന്വേഷണം നടത്തണം.
പാർട്ടിമാറ്റത്തിന് വിലക്ക്: പാർട്ടി മാറുന്ന എംഎൽഎ / എംപിമാർക്ക് 20 വർഷം തെരഞ്ഞെടുപ്പ് വിലക്ക് ഏർപ്പെടുത്തണം.

വൈറലായ മെമ്പർഷിപ്പ് യോഗ്യതകൾ

പാർട്ടിയുടെ “മെമ്പർഷിപ്പ് യോഗ്യതകൾ” സോഷ്യൽ മീഡിയയിൽ ഏറ്റവും കൂടുതൽ വൈറലായ ഭാഗങ്ങളിലൊന്നായിരുന്നു.

സിജെപി മെമ്പർഷിപ്പ് മാനദണ്ഡങ്ങൾ
1. നിങ്ങൾ തൊഴിലില്ലായ്മ അനുഭവിക്കുന്ന ആളായിരിക്കണം.
2. ജീവിതത്തിൽ കടുത്ത ബുദ്ധിമുട്ടുകൾ നേരിടുന്ന ആളായിരിക്കണം.
3. ദിവസവും മണിക്കൂറുകളോളം സോഷ്യൽ മീഡിയയിൽ സജീവമായിരിക്കണം (Chronically Online).
4. സിസ്റ്റത്തെ നന്നായി വിമർശിക്കാൻ (Rant) അറിയുന്ന ആളായിരിക്കണം.

ഇത് മുഴുവൻ പരിഹാസ രൂപത്തിലാണെങ്കിലും, ഇന്നത്തെ യുവത്വത്തിന്റെ യഥാർത്ഥ അവസ്ഥയാണ് ഇതിലൂടെ പ്രതിഫലിക്കുന്നത്. അതുകൊണ്ടുതന്നെ ഈ “ഫലിത നിയമങ്ങൾ” യുവാക്കൾക്ക് വളരെ റിലേറ്റബിൾ ആയി തോന്നുകയും ലക്ഷക്കണക്കിന് ആളുകൾ മിനിറ്റുകൾക്കകം വെബ്സൈറ്റിൽ അംഗങ്ങളാവുകയും ചെയ്തു. മഹുവ മൊയ്ത്ര അടക്കമുള്ള മുഴുവൻ സമയ രാഷ്ട്രീയക്കാരും, പ്രശാന്ത് ഭൂഷണെപ്പോലുള്ള പ്രമുഖരും ഇതിനകം തന്നെ ഈ മൂവ്‌മെന്റിന് പിന്തുണ പ്രഖ്യാപിച്ചിട്ടുണ്ട്.

വെർച്വലിൽ നിന്ന് റിയാലിറ്റിയിലേക്ക്?

“വോയ്സ് ഓഫ് ദി ലേസി ആൻഡ് അൺഎംപ്ലോയ്ഡ്” (Voice of the Lazy & Unemployed) എന്ന ടാഗ്‌ലൈനോടെ വന്ന ഈ കൂട്ടായ്മ വെറുമൊരു ഓൺലൈൻ ട്രോളിൽ ഒതുങ്ങില്ലെന്നാണ് സൂചനകൾ. ബിഹാറിലെ വരാനിരിക്കുന്ന ബങ്കിപൂർ അസംബ്ലി ഉപതെരഞ്ഞെടുപ്പിൽ സിജെപി പിന്തുണയോടെ സ്ഥാനാർത്ഥിയെ നിർത്താൻ പോലും അണിയറയിൽ ആലോചനകൾ നടക്കുന്നുണ്ട്.

പ്രതിസന്ധികൾ എത്രവന്നാലും അതിജീവിച്ചു മുന്നോട്ട് പോകുന്ന സാധാരണക്കാരുടെ പ്രതീകമായി തന്നെയാണ് ഇന്ന് CJP ആ പേരിനെ മാറ്റിയിരിക്കുന്നത്. ഒരു ട്രോളായി തുടങ്ങിയ ഈ ആശയം, ഇന്ന് ഇന്ത്യൻ യുവാക്കളുടെ ജീവിത യാഥാർത്ഥ്യങ്ങളും സിസ്റ്റത്തോടുള്ള അസന്തോഷങ്ങളും തുറന്ന് പറയാനുള്ള ഒരു വലിയ വേദിയായി മാറിക്കഴിഞ്ഞു.