കാസർഗോഡ്: ജനങ്ങളെ തെറ്റിദ്ധരിപ്പിച്ച് തെരുവിലിറക്കാനും സംഘർഷങ്ങൾ സൃഷ്ടിച്ച് രാജ്യത്തെ തിരഞ്ഞെടുപ്പ് സംവിധാനത്തെ ദുർബലപ്പെടുത്താനുമാണ് പ്രതിപക്ഷ പാർട്ടികൾ ശ്രമിക്കുന്നതെന്ന് ബി.ജെ.പി സംസ്ഥാന ജനറൽ സെക്രട്ടറി എം.ടി. രമേശ് ആരോപിച്ചു. മുൻകാലങ്ങളിൽ അഴിച്ചുവിട്ട പല വ്യാജപ്രചാരണങ്ങളും ജനങ്ങൾ തള്ളിക്കളഞ്ഞതിന്റെ നിരാശയും അസഹിഷ്ണുതയുമാണ് പ്രതിപക്ഷ നേതാക്കൾ ഇപ്പോൾ പ്രകടിപ്പിക്കുന്നതെന്നും അദ്ദേഹം പറഞ്ഞു.
കാസർഗോഡ് മുനിസിപ്പൽ കോൺഫറൻസ് ഹാളിൽ സേവ് ഡെമോക്രസി ഫോറം സംഘടിപ്പിച്ച ‘തീവ്ര വോട്ടർ പട്ടിക പരിഷ്കരണം: ശരിയും തെറ്റും’ എന്ന വിഷയത്തിലുള്ള സെമിനാർ ഉദ്ഘാടനം ചെയ്ത് സംസാരിക്കുകയായിരുന്നു എം.ടി. രമേശ്.
‘കോൺഗ്രസ് ഭരിക്കുന്ന സംസ്ഥാനങ്ങളിലും വോട്ടുകൾ നീക്കം ചെയ്യപ്പെട്ടു’
കർണാടകയിലും പഞ്ചാബിലും അടുത്തിടെ നടന്ന വോട്ടർ പട്ടിക പരിഷ്കരണത്തിൽ ലക്ഷക്കണക്കിന് വ്യാജ വോട്ടുകൾ നീക്കം ചെയ്യപ്പെട്ടിട്ടുണ്ടെന്ന് അദ്ദേഹം ചൂണ്ടിക്കാട്ടി. ഈ രണ്ട് സംസ്ഥാനങ്ങളിലും ബി.ജെ.പിയല്ല ഭരണം നടത്തുന്നത്. പശ്ചിമ ബംഗാളിൽ തൃണമൂൽ സർക്കാരിന്റെ ശക്തമായ നിയന്ത്രണത്തിലാണ് തിരഞ്ഞെടുപ്പ് നടന്നത്. അവിടെ ബി.ജെ.പി വലിയ മുന്നേറ്റമാണ് കാഴ്ചവെച്ചതെന്നും എം.ടി. രമേശ് ഓർമ്മിപ്പിച്ചു.
ഇ.വി.എം ആരോപണങ്ങളിൽ തെളിവില്ല
ഇലക്ട്രോണിക് വോട്ടിങ് മെഷീനുകൾക്കെതിരെ രാഹുൽ ഗാന്ധിയും കൂട്ടരും അടിസ്ഥാനരഹിതമായ ആരോപണങ്ങളാണ് ഉന്നയിക്കുന്നത്. ചിപ്പ് ഉപയോഗിച്ച് ഇ.വി.എം ഹാക്ക് ചെയ്യുന്നുവെന്ന് ആരോപിക്കുന്നവർക്ക് ഒരു തെളിവും ഹാജരാക്കാൻ കഴിഞ്ഞിട്ടില്ല. ഈ വിഷയത്തിൽ കോടതിയെ സമീപിക്കാൻ പോലും ഇവർ തയ്യാറാകുന്നില്ല. 13 കോടി വോട്ടർമാർക്ക് വോട്ടവകാശം നഷ്ടപ്പെട്ടുവെന്ന് പ്രചരിപ്പിക്കുന്നവർ, തിരഞ്ഞെടുപ്പ് പ്രക്രിയയിൽ പങ്കാളികളായ തങ്ങളുടെ ഏജന്റുമാർ എന്തെടുക്കുകയായിരുന്നു എന്ന ചോദ്യത്തിന് മറുപടി പറയണമെന്നും അദ്ദേഹം വ്യക്തമാക്കി.
സ്വാതന്ത്ര്യത്തിന് ശേഷം നിരവധി തവണ സ്പെഷ്യൽ ഇന്റൻസീവ് റിവിഷൻ (എസ്.ഐ.ആർ.) നടന്നിട്ടുണ്ടെങ്കിലും സാങ്കേതികവിദ്യയുടെ സഹായത്തോടെ വ്യാജ വോട്ടർമാരെയും ഇരട്ട വോട്ടുകളെയും കൃത്യമായി പുറത്താക്കാൻ തുടങ്ങിയതോടെയാണ് പ്രതിപക്ഷം ഭയപ്പെടുന്നതെന്നും അദ്ദേഹം പരിഹസിച്ചു.
സെമിനാറിൽ പ്രമുഖരുടെ സാന്നിധ്യം
സേവ് ഡെമോക്രസി ഫോറം ജില്ലാ കോർഡിനേറ്റർ എം.എൽ. അശ്വിനി അധ്യക്ഷത വഹിച്ച ചടങ്ങിൽ സഹകാർ ഭാരതി സംസ്ഥാന അധ്യക്ഷൻ അഡ്വ. കെ. കരുണാകരൻ നമ്പ്യാർ മോഡറേറ്ററായി. മാധ്യമപ്രവർത്തകൻ എ.പി. അഹമ്മദ്, ബി.ജെ.പി സംസ്ഥാന സെൽ കോർഡിനേറ്റർ അഡ്വ. വി.കെ. സജീവൻ, എഴുത്തുകാരൻ സുകുമാരൻ പെരിയച്ചൂർ, പി.ആർ. സുനിൽ, സുകുമാരൻ കുദ്രെപ്പാടി തുടങ്ങിയവർ ചടങ്ങിൽ പങ്കെടുത്തു സംസാരിച്ചു.
Leave a Reply