കാസർകോട്: ജില്ലയിലെ എംഎസ്എഫ് (MSF) നേതൃത്വത്തിൽ ഭിന്നത രൂക്ഷമായതിനെ തുടർന്ന് അഞ്ച് പ്രമുഖ ജില്ലാ ഭാരവാഹികൾ തങ്ങളുടെ സ്ഥാനങ്ങളിൽ നിന്ന് രാജിവെച്ചു. ജില്ലാ ട്രഷറർ സർഫറാസ് ബന്തിയോട്, വൈസ് പ്രസിഡന്റുമാരായ ജംഷീർ മൊഗ്രാൽ, മുർഷിദ് മൊഗ്രാൽ, സെക്രട്ടറിമാരായ ബിലാൽ ആരിക്കാടി, അൻസാർ വോർക്കടി എന്നിവരാണ് ഒന്നിച്ച് രാജിവെച്ചത്. ജില്ലാ പ്രസിഡന്റും ജനറൽ സെക്രട്ടറിയും ചേർന്ന് ഏകപക്ഷീയമായ തീരുമാനങ്ങൾ കൈക്കൊള്ളുന്നുവെന്ന് ആരോപിച്ചാണ് രാജി.
എംഎസ്എഫ് സംസ്ഥാന കമ്മിറ്റിയിലേക്കുള്ള ജില്ലാ പ്രതിനിധിയെ തെരഞ്ഞെടുക്കുന്നതുമായി ബന്ധപ്പെട്ട തർക്കമാണ് പരസ്യമായ കൂട്ടരാജിയിലേക്ക് നയിച്ചത്. ജില്ലാ കൗൺസിലിന്റെ തീരുമാനങ്ങളെ കാറ്റിൽപ്പറത്തി നേതൃത്വം ഏകപക്ഷീയമായി പ്രതിനിധിയെ നിശ്ചയിക്കുകയായിരുന്നുവെന്ന് രാജിവെച്ച നേതാക്കൾ വ്യക്തമാക്കി. കൗൺസിൽ നിർദേശിച്ച മുൻ ജില്ലാ ജനറൽ സെക്രട്ടറി സവാദ് അംഗദിമുഗറിന്റെ പേര് അവഗണിച്ചു ഒഴിവാക്കിയതാണ് പ്രധാന അമർഷത്തിന് കാരണം.
ജില്ലാ ഭാരവാഹികളുമായി ആശയവിനിമയം നടത്താതെയും കൂടിയാലോചനകൾ പൂർണ്ണമായും ഒഴിവാക്കിയുമാണ് നിലവിലെ നേതൃത്വം മുന്നോട്ടുപോകുന്നത്. സംഘടനയുടെ സ്വാഭാവികമായ ജനാധിപത്യ മര്യാദകളെയും കൗൺസിൽ തീരുമാനങ്ങളെയും തകിടംമറിക്കുന്ന നിലപാടുകളുമായി ഒത്തുപോകാൻ കഴിയില്ലെന്നാണ് ഇവരുടെ നിലപാട്. താഴെത്തട്ടിലുള്ള പ്രവർത്തകരുടെ അഭിപ്രായങ്ങൾക്ക് വിലകൽപിക്കുന്ന ജനാധിപത്യപരമായ പ്രവർത്തനരീതി സംഘടനയിൽ പുനഃസ്ഥാപിക്കണമെന്നും അവർ ആവശ്യപ്പെട്ടു.
ഒരേസമയം അഞ്ച് പ്രധാന ജില്ലാ ഭാരവാഹികൾ പടിയിറങ്ങിയത് എംഎസ്എഫ് കാസർകോട് ജില്ലാ ഘടകത്തിൽ കടുത്ത രാഷ്ട്രീയ പ്രതിസന്ധിയാണ് സൃഷ്ടിച്ചിരിക്കുന്നത്.
Leave a Reply