കാസർകോട്: ഹൊസങ്കടിയ്ക്ക് സമീപം പൊസോട്ടിൽ കർണാടക ആർടിസി ബസ് നിയന്ത്രണം വിട്ട് ഡിവൈഡറിലിടിച്ച് അപകടം. അപകടത്തിൽ സ്ത്രീകളടക്കം പത്തോളം യാത്രക്കാർക്ക് പരിക്കേറ്റു. ഞായറാഴ്‌ച ഉച്ചയ്ക്ക് ഒന്നരയോടെയാണ് സംഭവം. കാസർകോട്ടുനിന്ന് മംഗളൂരുവിലേക്ക് പോവുകയായിരുന്ന ബസാണ് അപകടത്തിൽപെട്ടത്.
അപകടം നടന്നത് ഇങ്ങനെ
ഹൊസങ്കടിയിൽ നിന്ന് സർവീസ് റോഡിലൂടെ ഓടിയ ബസ് പിന്നീട് ദേശീയപാതയിലേക്ക് പ്രവേശിക്കുകയായിരുന്നു. തുടർന്ന് അമിത വേഗതയിലായിരുന്ന ബസ് നിയന്ത്രണം വിട്ട് ദേശീയപാതയിലെ ഡിവൈഡറിലും തുടർന്ന് സുരക്ഷാഭിത്തിയിലും ശക്തമായി ഇടിച്ചു നിൽക്കുകയായിരുന്നു. ഇടിച്ചതിന്റെ ആഘാതത്തിൽ ബസിന്റെ മുൻഭാഗം പൂർണമായും തകർന്നു.
ഡ്രൈവർക്കും നാല് സ്ത്രീകൾ ഉൾപ്പെടെ പത്തിലധികം യാത്രക്കാർക്കുമാണ് അപകടത്തിൽ പരിക്കേറ്റത്. പരിക്കേറ്റവരെ ഉടൻതന്നെ സമീപത്തെ ആശുപത്രികളിൽ പ്രവേശിപ്പിച്ചു.
പോലീസെത്തി, പിന്നാലെ പ്രതിഷേധവും
വിവരമറിഞ്ഞ് ഹൈവേ പോലീസും മഞ്ചേശ്വരം പോലീസും സ്ഥലത്തെത്തി പ്രാഥമിക നടപടികൾ സ്വീകരിച്ചു. എന്നാൽ സർവീസ് റോഡിലൂടെ പോകേണ്ട ബസ് നിയമം തെറ്റിച്ച് ദേശീയപാതയിലൂടെ ഓടിച്ചതാണ് അപകടത്തിന് കാരണമായതെന്ന് യാത്രക്കാർ ആരോപിച്ചു.
സംഭവത്തെ തുടർന്ന് നാട്ടുകാരും യാത്രക്കാരും റോഡിൽ ശക്തമായ പ്രതിഷേധവുമായി രംഗത്തെത്തി. ബസ് ജീവനക്കാരും നാട്ടുകാരും തമ്മിൽ വാക്കേറ്റവുമുണ്ടായി. യാത്രാബസുകൾ നിയമം ലംഘിച്ച് ദേശീയപാതയിലൂടെ ഓടാൻ അനുവദിക്കരുതെന്നും ഇതിനെതിരെ അധികൃതർ കർശന നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.
Leave a Reply