ബി.സി റോഡ് കൊലപാതകം: പ്രതി ചേതൻ പോലീസ് അറസ്റ്റിൽ; പിടിയിലായത് എലിവിഷം കഴിച്ച് ആത്മഹത്യയ്ക്ക് ശ്രമിച്ച നിലയിൽ

ബണ്ട്വാൾ: ദക്ഷിണ കന്നഡ ജില്ലയിലെ ബി.സി. റോഡ് കെ.എസ്.ആർ.ടി.സി ബസ് സ്റ്റാൻഡിൽ വെച്ച് 21-കാരിയായ നേഴ്സ് ലാവണ്യയെ വെട്ടിക്കൊലപ്പെടുത്തിയ കേസിൽ പ്രതിയായ ചേതനെ (22) ബണ്ട്വാൾ ടൗൺ പോലീസ് കസ്റ്റഡിയിലെടുത്തു. കൊലപാതകത്തിന് ശേഷം ഒളിവിൽ പോയ പ്രതി എലിവിഷം കഴിച്ച് ആത്മഹത്യയ്ക്ക് ശ്രമിച്ചതിനെ തുടർന്ന് നിലവിൽ ആശുപത്രിയിൽ ചികിത്സയിലാണ്. ദക്ഷിണ കന്നഡ പോലീസ് സൂപ്രണ്ട് (SP) കെ. അരുണിന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് പ്രതിയെ കണ്ടെത്തിയത്.

ബെൽത്തങ്ങാടി താലൂക്കിലെ ഒഡിനാൽ സ്വദേശിയാണ് പിടിയിലായ ചേതൻ. കൊല്ലപ്പെട്ട ലാവണ്യയുടെ അകന്ന ബന്ധു കൂടിയാണ് ഇയാൾ.

ഓടി രക്ഷപെടാൻ ശ്രമിച്ച ലാവണ്യയെ പിന്തുടർന്ന് വെട്ടി; നടുക്കം മാറാതെ ദൃക്‌സാക്ഷികൾ

വ്യാഴാഴ്ച വൈകുന്നേരം 6 മണിയോടെയാണ് നാടിനെ നടുക്കിയ ദാരുണ സംഭവം അരങ്ങേറിയത്. കല്ലഡ്കയിലെ സ്വകാര്യ ക്ലിനിക്കിൽ നഴ്സായി ജോലി ചെയ്തിരുന്ന ലാവണ്യ, ജോലി കഴിഞ്ഞ് കക്യപദാവുവിലുള്ള തന്റെ വീട്ടിലേക്ക് മടങ്ങാൻ ബി.സി റോഡ് ബസ് സ്റ്റാൻഡിൽ എത്തിയതായിരുന്നു.

ലാവണ്യ കക്യപദാവുവിലേക്ക് പോകാനുള്ള കെ.എസ്.ആർ.ടി.സി ബസിൽ കയറി സീറ്റിലിരുന്നപ്പോൾ, ബാഗിൽ മാരകായുധവുമായി ചേതനും ഇതേ ബസിലേക്ക് കയറി.
പ്രതി ആയുധം പുറത്തെടുക്കുന്നത് കണ്ട് ഭയന്ന ലാവണ്യ ജീവരക്ഷാർത്ഥം ബസിൽ നിന്ന് പുറത്തേക്കോടി.
എന്നാൽ യാത്രക്കാരുടെയും പൊതുജനങ്ങളുടെയും മുൻപിൽ വെച്ച് ചേതൻ യുവതിയെ പിന്തുടർന്ന് കഴുത്തിന് പുറകിൽ മാരകമായി വെട്ടുകയായിരുന്നു.

ആക്രമണത്തിന് ശേഷം ആയുധം സംഭവസ്ഥലത്ത് തന്നെ ഉപേക്ഷിച്ച് പ്രതി കാറിൽ കയറി രക്ഷപെട്ടു. ചോര വാർന്ന് കിടന്ന ലാവണ്യയെ ഉടൻ തന്നെ നാട്ടുകാർ ബണ്ട്വാൾ താലൂക്ക് സർക്കാർ ആശുപത്രിയിൽ എത്തിച്ചെങ്കിലും അതിനോടകം തന്നെ മരണം സംഭവിച്ചിരുന്നതായി ഡോക്ടർമാർ സ്ഥിരീകരിച്ചു.

കാരണം പ്രണയപ്പകയും നിരന്തര ശല്യപ്പെടുത്തലും

പ്രതിക്ക് ലാവണ്യയോടുണ്ടായിരുന്ന ഏകപക്ഷീയമായ പ്രണയപ്പകയാണ് കൊലപാതകത്തിൽ കലാശിച്ചതെന്ന് പോലീസ് സ്ഥിരീകരിച്ചു. മുൻപ് ഇവർ തമ്മിൽ പരിചയമുണ്ടായിരുന്നതായും എന്നാൽ ലാവണ്യ ഇയാളുടെ പ്രണയാഭ്യർത്ഥനകൾ നിരസിക്കുകയും അകലം പാലിക്കുകയും ചെയ്തിരുന്നു. ഇതിലുള്ള വൈരാഗ്യമാണ് ക്രൂരമായ കൊലപാതകത്തിന് ചേതനെ പ്രേരിപ്പിച്ചത്.

പ്രതി യുവതിയെ ആക്രമിക്കുന്നതിന്റെയും പിന്നീട് സംഭവസ്ഥലത്ത് നിന്ന് ഓടി രക്ഷപെടുന്നതിന്റെയും സിസിടിവി ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. സംഭവത്തിൽ ബണ്ട്വാൾ ടൗൺ പോലീസ് കേസ് രജിസ്റ്റർ ചെയ്ത് തുടർനടപടികൾ സ്വീകരിച്ചു വരികയാണ്.