തിരുവനന്തപുരം: സിഎംആർഎൽ-എക്സാലോജിക് സാമ്പത്തിക ഇടപാട് കേസിൽ മുഖ്യമന്ത്രിയുടെ മകൾ വീണാ വിജയന് എൻഫോഴ്സ്മെന്റ് ഡയറക്ടറേറ്റിന്റെ (ഇ ഡി) നോട്ടീസ്. വരും ദിവസങ്ങളിൽ കേസ് അന്വേഷണം ശക്തമാക്കുന്നതിന്റെ ഭാഗമായാണ് ഇ ഡി നടപടി. വെള്ളിയാഴ്ച രാവിലെ പത്തരയ്ക്ക് കൊച്ചി ഓഫീസിൽ ചോദ്യം ചെയ്യലിന് ഹാജരാകാനാണ് നിർദേശം.
വീണ ഉൾപ്പെടെ ആകെ ഒമ്പത് പേർക്കാണ് ഇ ഡി നിലവിൽ സമൻസ് അയച്ചിരിക്കുന്നത്. സിഎംആർഎൽ എംഡി ശശിധരൻ കർത്തയുടെ ഭാര്യ, മകൻ ശരൺ എസ് കർത്ത, കമ്പനിയിലെ മറ്റ് ഉയർന്ന ഉദ്യോഗസ്ഥർ എന്നിവരും സമൻസ് ലഭിച്ചവരിൽ ഉൾപ്പെടുന്നു.
വിദേശ അക്കൗണ്ടുകളിലേക്ക് അന്വേഷണം; വ്യക്തമായ തെളിവുകളുണ്ടെന്ന് ഇ ഡി
വീണയ്ക്കെതിരെ വ്യക്തമായ തെളിവുകൾ ലഭിച്ച ശേഷമാണ് ചോദ്യം ചെയ്യലിലേക്ക് കടക്കുന്നതെന്ന് ഇ ഡി വൃത്തങ്ങൾ സൂചിപ്പിച്ചു. വീണയുടെ വിദേശ ബാങ്ക് അക്കൗണ്ടുകൾ കേന്ദ്രീകരിച്ചുള്ള ഇടപാടുകളും അന്വേഷണ പരിധിയിൽ വരും. ഹാജരാകുമ്പോൾ താഴെ പറയുന്ന രേഖകൾ കൂടെ കരുതാൻ നിർദേശമുണ്ട്:
- കഴിഞ്ഞ വർഷങ്ങളിലെ ബാങ്ക് അക്കൗണ്ട് രേഖകൾ
- ആദായ നികുതി റിട്ടേൺ രേഖകൾ
- സ്വന്തം പേരിലുള്ള സ്വത്ത് വിവരങ്ങളുടെ രേഖകൾ
- സിഎംആർഎല്ലുമായി നടത്തിയ സാമ്പത്തിക ഇടപാടുകളുടെ വിശദാംശങ്ങൾ
കഴിഞ്ഞ ദിവസം ഇ ഡി ഡയറക്ടർ രാഹുൽ നവീന്റെ നേതൃത്വത്തിൽ കൊച്ചിയിൽ അടിയന്തര യോഗം ചേർന്നിരുന്നു. കേസിൽ ഇതുവരെ ശേഖരിച്ച വിവരങ്ങൾ വിലയിരുത്തിയ ഡയറക്ടർ, പഴുതടച്ചുള്ള അന്വേഷണവുമായി മുന്നോട്ട് പോകാനും നിയമപരമായ തിരിച്ചടികൾ ഉണ്ടാകാതിരിക്കാൻ എല്ലാ ഡിജിറ്റൽ-ബാങ്ക് തെളിവുകളും കൃത്യമായി ശേഖരിക്കാനും ഉദ്യോഗസ്ഥർക്ക് കർശന നിർദേശം നൽകിയിട്ടുണ്ട്.
ഹൈക്കോടതി വിധിക്ക് പിന്നാലെ നീക്കങ്ങൾ വേഗത്തിലാക്കി
കേസിൽ ഇ ഡി അന്വേഷണം തടയണമെന്ന് ആവശ്യപ്പെട്ട് സിഎംആർഎൽ നൽകിയ അപ്പീൽ കഴിഞ്ഞ ദിവസം ഹൈക്കോടതി ഡിവിഷൻ ബെഞ്ച് തള്ളിയിരുന്നു. ഇ ഡി അന്വേഷണം തുടരുന്നതിൽ യാതൊരുവിധ നിയമപരമായ വിലക്കുകളുമില്ലെന്ന് കോടതി വ്യക്തമാക്കിയതോടെയാണ് കേന്ദ്ര ഏജൻസി നടപടികൾ വേഗത്തിലാക്കിയത്.
Leave a Reply