റൊണാൾഡോ ഇഫക്റ്റ് ; ലോകകപ്പ് ക്വാർട്ടർ ടിക്കറ്റ് നിരക്കുകൾ കുത്തനെ ഇടിഞ്ഞു

ന്യൂയോർക്ക്: ഫിഫ ലോകകപ്പിന്റെ ആവേശം ക്വാർട്ടർ ഫൈനൽ മത്സരങ്ങളിലേക്ക് കടക്കവേ, കായിക ലോകത്തെ ഞെട്ടിച്ച് ടിക്കറ്റ് നിരക്കുകളിൽ വൻ ഇടിവ്. ടൂർണമെന്റിലെ വമ്പന്മാരും ആതിഥേയരുമായ അമേരിക്കയും, ക്രിസ്റ്റ്യാനോ റൊണാൾഡോയുടെ പോർച്ചുഗലും പ്രീ-ക്വാർട്ടറിൽ പുറത്തായതിന് പിന്നാലെയാണ് നിർണ്ണായക മത്സരങ്ങളുടെ ടിക്കറ്റ് വിലയിൽ വലിയ കുറവുണ്ടായിരിക്കുന്നത്.
പ്രമുഖ സെക്കൻഡറി ടിക്കറ്റ് മാർക്കറ്റ്‌പ്ലേസായ ‘ടിക്-പിക്’ (TickPick) പുറത്തുവിട്ട വിവരങ്ങൾ പ്രകാരം, വരാനിരിക്കുന്ന സ്പെയിൻ-ബെൽജിയം ക്വാർട്ടർ ഫൈനൽ മത്സരത്തിന്റെ ടിക്കറ്റ് നിരക്കിലാണ് ഏറ്റവും വലിയ ഇടിവ് രേഖപ്പെടുത്തിയത്. നേരത്തെ കനത്ത ഡിമാൻഡ് കാരണം ഏകദേശം 2,950 ഡോളർ (ഏകദേശം 2.47 ലക്ഷം ഇന്ത്യൻ രൂപ) വരെ ഉയർന്നിരുന്ന ടിക്കറ്റ് വില, ചൊവ്വാഴ്ച ഉച്ചയോടെ 1,200 ഡോളറിലേക്ക് (ഏകദേശം 1 ലക്ഷം രൂപ) കൂപ്പുകുത്തുകയായിരുന്നു. 50 ശതമാനത്തിലധികമാണ് വിലയിലെ ഈ കുറവ്.
ആരാധകരെ അകറ്റിയത് യുഎസിന്റെ പരാജയം
പ്രീ-ക്വാർട്ടർ പോരാട്ടത്തിൽ ബെൽജിയത്തോട് ഒന്നിനെതിരെ നാല് ഗോളുകൾക്ക് അമേരിക്ക പരാജയപ്പെട്ടതാണ് ടിക്കറ്റുകളുടെ ഡിമാൻഡ് പെട്ടെന്ന് കുറയാൻ പ്രധാന കാരണമായി ചൂണ്ടിക്കാണിക്കപ്പെടുന്നത്. സ്വന്തം നാട്ടിൽ നടക്കുന്ന ലോകകപ്പിൽ ആതിഥേയർ ക്വാർട്ടർ ഫൈനലിൽ പ്രവേശിച്ചിരുന്നെങ്കിൽ ആരാധകരുടെ വൻ തിരക്ക് കാരണം ടിക്കറ്റ് വില റെക്കോർഡുകൾ ഭേദിച്ച് ഉയരുമായിരുന്നു. എന്നാൽ യുഎസിന്റെ പുറത്താകൽ പ്രാദേശിക ആരാധകരുടെ ആവേശം കുറച്ചു.
റൊണാൾഡോയുടെ മടക്കവും തിരിച്ചടിയായി
യുഎസ് പുറത്തായതിന് പിന്നാലെ സൂപ്പർ താരം ക്രിസ്റ്റ്യാനോ റൊണാൾഡോയുടെ പോർച്ചുഗൽ പ്രീ-ക്വാർട്ടറിൽ സ്പെയിനിനോട് തോറ്റ് മടങ്ങിയതും ടിക്കറ്റ് വിപണിയെ ശക്തമായി ബാധിച്ചു. ക്രിസ്റ്റ്യാനോ റൊണാൾഡോയും ആതിഥേയരായ അമേരിക്കയും തമ്മിലുള്ള ഒരു സ്വപ്ന ക്വാർട്ടർ ഫൈനൽ പോരാട്ടമായിരുന്നു ഫുട്ബോൾ ആരാധകരും ടിക്കറ്റ് വ്യാപാരികളും ഒരേപോലെ പ്രതീക്ഷിച്ചിരുന്നത്. ഈ രണ്ട് വമ്പൻ ടീമുകളും ഒരുമിച്ച് പുറത്തായതോടെ വിപണിയിലെ ഹൈപ്പ് പെട്ടെന്ന് താഴേക്ക് പോവുകയായിരുന്നു.
ടിക്കറ്റ് നിരക്കിലെ ഈ വൻ ഇടിവ് സാധാരണക്കാരായ ഫുട്ബോൾ പ്രേമികൾക്ക് കുറഞ്ഞ ചെലവിൽ ലോകകപ്പ് ക്വാർട്ടർ നേരിട്ട് കാണാനുള്ള ഒരു സുവർണ്ണാവസരമായി മാറിയിരിക്കുകയാണ്.