കാസർകോട്: പള്ളിക്കര ഗവൺമെൻ്റ് ഹൈസ്കൂൾ ഗ്രൗണ്ടിൽ അപകടകരമായ രീതിയിൽ കാർ റേസിംഗ് നടത്തിയ സംഘത്തെ ബേക്കൽ പൊലീസ് കസ്റ്റഡിയിലെടുത്തു. സ്കൂൾ വിട്ട് വിദ്യാർഥികൾ പുറത്തേക്ക് ഇറങ്ങുന്ന സമയത്തായിരുന്നു ഗ്രൗണ്ടിൽ വാഹനങ്ങൾ ഉപയോഗിച്ചുള്ള അപകടകരമായ പ്രകടനം. ഈ സമയം നിരവധി വിദ്യാർഥികളും രക്ഷിതാക്കളും ഗ്രൗണ്ടിലുണ്ടായിരുന്നു. ‘ഓപ്പറേഷൻ തൂഫാൻ’ പ്രചാരണമെന്നു പറഞ്ഞാണ് സംഘം റേസിംഗ് നടത്തിയത്.
നാട്ടുകാർ വിവരമറിയിച്ചതിനെ തുടർന്ന് സ്ഥലത്തെത്തിയ ബേക്കൽ പൊലീസിലെ പ്രൊബേഷൻ എസ്.ഐ പ്രിൻസ് ജോൺ റേസിംഗ് അവസാനിപ്പിക്കാൻ ആവശ്യപ്പെട്ടെങ്കിലും സംഘം അദ്ദേഹത്തെ ആക്രമിക്കുകയായിരുന്നു. മർദ്ദനമേറ്റ എസ്.ഐയെ കാഞ്ഞങ്ങാട് ജില്ലാ ആശുപത്രിയിൽ പ്രവേശിപ്പിച്ചു. അദ്ദേഹത്തിൻ്റെ ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു.
സിആർ സെവൻ (CR7) കാറുകളും കസ്റ്റഡിയിൽ
സംഭവസ്ഥലത്തുനിന്നും റേസിംഗിന് ഉപയോഗിച്ച ആറ് കാറുകൾ പൊലീസ് കസ്റ്റഡിയിലെടുത്തു. ഇതിൽ ഫുട്ബോൾ താരം ക്രിസ്റ്റ്യാനോ റൊണാൾഡോയുടെ ചിത്രവും ‘CR7’ സ്റ്റിക്കറുകളും പതിപ്പിച്ച കാറുകളും ഉൾപ്പെടുന്നു. കസ്റ്റഡിയിലെടുത്ത വാഹനങ്ങൾ ബേക്കൽ പൊലീസ് സ്റ്റേഷനിലേക്ക് മാറ്റിയിട്ടുണ്ട്.
പൊതുസ്ഥലത്ത് അപകടകരമായ രീതിയിൽ വാഹനമോടിച്ച് വിദ്യാർഥികളുടെയും നാട്ടുകാരുടെയും ജീവൻ അപകടത്തിലാക്കിയതിനും, ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥനെ ആക്രമിച്ചതിനും ഉൾപ്പെടെ വിവിധ വകുപ്പുകൾ ചുമത്തിയാണ് ബേക്കൽ പൊലീസ് കേസ് രജിസ്റ്റർ ചെയ്തിരിക്കുന്നത്.
ഡിജിറ്റൽ തെളിവുകൾ കേന്ദ്രീകരിച്ച് അന്വേഷണം ഊർജിതം
സംഭവത്തിൽ പങ്കെടുത്തവരെയും എസ്.ഐയെ മർദ്ദിച്ചവരെയും തിരിച്ചറിയാനുള്ള നടപടികൾ പൊലീസ് ഊർജിതമാക്കിയിട്ടുണ്ട്. പ്രദേശത്തെ സിസിടിവി ക്യാമറ ദൃശ്യങ്ങൾ, നാട്ടുകാർ മൊബൈൽ ഫോണിൽ പകർത്തിയ വീഡിയോകൾ, റേസിംഗിൻ്റെ മറ്റ് ദൃശ്യങ്ങൾ എന്നിവ പൊലീസ് ശേഖരിച്ചുവരികയാണ്. പ്രതികളെ മുഴുവൻ നിയമത്തിന് മുന്നിൽ കൊണ്ടുവരുമെന്നും ഡിജിറ്റൽ തെളിവുകൾ പരിശോധിച്ച് കൂടുതൽ പേരെ ഉടൻ പിടികൂടുമെന്നും ബേക്കൽ പൊലീസ് വ്യക്തമാക്കി.
Leave a Reply