കാസർകോട് ജില്ലയിൽ ആദ്യമായി കോറി റോബോട്ടിക് കാൽമുട്ട് മാറ്റിവെക്കൽ ശസ്ത്രക്രിയ; വിജയകരമായി പൂർത്തിയാക്കി ആസ്റ്റർ മിംസ്

കാസർകോട്: വടക്കൻ മലബാറിലെ ചികിത്സാ രംഗത്ത് പുതിയ ചരിത്രമെഴുതി കാസർകോട് ആസ്റ്റർ മിംസ് ഹോസ്പിറ്റൽ. ജില്ലയിൽ ആദ്യമായി അത്യാധുനിക ‘കോറി റോബോട്ടിക്’ (CORI Robotic) സാങ്കേതികവിദ്യ ഉപയോഗിച്ചുള്ള കാൽമുട്ട് മാറ്റിവെക്കൽ ശസ്ത്രക്രിയ കാസർകോട് ആസ്റ്റർ മിംസിൽ വിജയകരമായി പൂർത്തിയാക്കി. ശസ്ത്രക്രിയ കഴിഞ്ഞ് വെറും നാലാം മണിക്കൂറിൽ തന്നെ രോഗിക്ക് നടക്കാൻ സാധിച്ചുവെന്നത് ഈ സാങ്കേതികവിദ്യയുടെ വലിയ വിജയമാണെന്ന് ആശുപത്രി അധികൃതർ വാർത്താസമ്മേളനത്തിൽ അറിയിച്ചു.

ചികിത്സാ രംഗത്തെ ഈ സുപ്രധാന നേട്ടത്തെക്കുറിച്ച് ആസ്റ്റർ മിംസ് ഓർത്തോപീഡിക്സ് വിഭാഗം മേധാവി ഡോ. മുഹമ്മദ് ഷബീർ ഖാസിം, ചീഫ് ഓപ്പറേറ്റിങ് ഓഫീസർ സുധീർ ബാസുരി, വിദഗ്ധ ഡോക്ടർമാരായ ഡോ. ദീക്ഷിത് ഷെട്ടി, ഡോ. അഭിരാം കൃഷ്ണൻ, ഡോ. അമീൻ ഗുൽഷൻ തുടങ്ങിയവർ വിശദീകരിച്ചു.

എന്താണ് കോറി റോബോട്ടിക് ശസ്ത്രക്രിയയുടെ പ്രത്യേകതകൾ?

സാധാരണ കാൽമുട്ട് മാറ്റിവെക്കൽ ശസ്ത്രക്രിയകളെ അപേക്ഷിച്ച് സങ്കീർണ്ണതകളും ബുദ്ധിമുട്ടുകളും പരമാവധി കുറക്കാൻ സഹായിക്കുന്ന നൂതന സംവിധാനമാണിത്.

മില്ലീമീറ്റർ കൃത്യത: ഓരോ രോഗിയുടെയും കാൽമുട്ടിന്റെ സവിശേഷമായ ഘടന കൃത്യമായി വിശകലനം ചെയ്ത്, മില്ലീമീറ്റർ കൃത്യതയോടെ ശസ്ത്രക്രിയ നടത്താൻ ഈ റോബോട്ടിക് സംവിധാനം സഹായിക്കുന്നു.
വേഗത്തിലുള്ള സുഖം പ്രാപിക്കൽ: തികഞ്ഞ കൃത്യതയോടെയുള്ള ശസ്ത്രക്രിയയായതിനാൽ പേശികൾക്കും കോശങ്ങൾക്കും ഉണ്ടാകുന്ന ആഘാതം വളരെ കുറവായിരിക്കും. ഇത് രോഗിക്ക് അതിവേഗം സാധാരണ ജീവിതത്തിലേക്ക് മടങ്ങാൻ വഴിയൊരുക്കുന്നു.
കൃത്രിമ സന്ധികൾക്ക് കൂടുതൽ ആയുസ്സ്: ശസ്ത്രക്രിയയിൽ ഉപയോഗിക്കുന്ന കൃത്രിമ സന്ധികൾ (Implants) ഏറ്റവും അനുയോജ്യമായ സ്ഥാനത്ത് ഉറപ്പാക്കാൻ കഴിയുന്നതിനാൽ, സന്ധിയുടെ തേയ്മാനം കുറയ്ക്കുകയും അതിന്റെ ആയുസ്സ് വർദ്ധിപ്പിക്കുകയും ചെയ്യുന്നു.
വേദനരഹിതമായ ചികിത്സ: കടുത്ത സന്ധിവാതവും സങ്കീർണ്ണമായ കാൽമുട്ട് വൈകല്യങ്ങളും മൂലം കഠിനമായ വേദന അനുഭവിക്കുന്നവർക്ക് ഈ വേദനരഹിത ചികിത്സ ഏറെ പ്രയോജനകരമാണ്.

“വേദനരഹിതമായ ചികിത്സയും വേഗത്തിലുള്ള രോഗമുക്തിയും ഉറപ്പാക്കുന്ന ഈ സംവിധാനം വിജയകരമായി അവതരിപ്പിക്കാൻ കഴിഞ്ഞത് ആശുപത്രിയുടെ വലിയ നേട്ടമാണ്. ശസ്ത്രക്രിയയിലെ കൃത്യത വർദ്ധിപ്പിക്കാനും കൂടുതൽ മികച്ച ഫലം രോഗികൾക്ക് നൽകാനും നൂതന റോബോട്ടിക് സാങ്കേതികവിദ്യയിലൂടെ സാധിക്കും.” – ഡോ. മുഹമ്മദ് ഷബീർ കാസ്സിം (ഓർത്തോപീഡിക്സ് വിഭാഗം മേധാവി)

ഇനി ദൂരയാത്രകൾ വേണ്ട; അത്യാധുനിക ചികിത്സ കാസർകോട് തന്നെ!

ആധുനിക വൈദ്യശാസ്ത്രത്തിലെ ഏറ്റവും മികച്ച സാങ്കേതികവിദ്യകൾ കാസർകോട് മേഖലയിലെ ജനങ്ങൾക്ക് പ്രാപ്യമാക്കുക എന്നതാണ് ആശുപത്രിയുടെ ലക്ഷ്യമെന്ന് കാസർകോട് ആസ്റ്റർ മിംസ് സി.ഓ.ഓ സുധീർ ബാസുരി വ്യക്തമാക്കി. ഈ പുതിയ റോബോട്ടിക് സാങ്കേതികവിദ്യ ലഭ്യമായതോടെ, സങ്കീർണ്ണമായ കാൽമുട്ട് മാറ്റിവെക്കൽ ശസ്ത്രക്രിയകൾക്കായി രോഗികൾക്ക് ഇനി മംഗലാപുരത്തോ കോഴിക്കോട്ടോ പോലുള്ള ദൂരസ്ഥലങ്ങളിലേക്ക് യാത്ര ചെയ്യേണ്ടി വരുന്നത് ഒഴിവാക്കാനാകും.

മേഖലയിലെ ജനങ്ങൾക്ക് ലോകോത്തര നിലവാരമുള്ള സാങ്കേതികവിദ്യകളും വിദഗ്ധ പരിചരണവും പ്രാദേശികമായി ലഭ്യമാക്കാനാണ് ആസ്റ്റർ മിംസ് ഹോസ്പിറ്റൽ മാനേജ്മെന്റ് ലക്ഷ്യമിടുന്നതെന്ന് മെഡിക്കൽ സുപ്രണ്ടന്റ് ഡോ. സാജിദ് സലാഹുദീൻ പറഞ്ഞു.