കുമ്പള: ആരിക്കാടി ടോൾ ബൂത്തിൽ പണപ്പിരിവ് നിർത്തിവെച്ചിട്ടും റോഡിലെ അപകടക്കെണികളായ ഹമ്പുകൾ നീക്കം ചെയ്യാത്തതിനെ തുടർന്ന് ദേശീയപാതയിൽ അപകടങ്ങൾ തുടർക്കഥയാകുന്നു. ഇന്നലെ വൈകിട്ടോടെ ടോൾ പ്ലാസയ്ക്ക് സമീപം ഇക്കോ വാനും കാറും കൂട്ടിയിടിച്ച് വലിയൊരു അപകടമാണ് ഉണ്ടായത്.
മംഗളൂരു ഭാഗത്ത് നിന്നും കുമ്പളയിലേക്ക് വരികയായിരുന്ന ഇക്കോ വാൻ ടോൾ ബൂത്തിലെ ഹമ്പുകൾ കണ്ട് വേഗത കുറച്ചപ്പോൾ, തൊട്ടുപിന്നാലെ വന്ന കാർ നിയന്ത്രണം വിട്ട് വാനിന്റെ പുറകിലേക്ക് ഇടിച്ചു കയറുകയായിരുന്നു. അപകടത്തിൽ ഇരു വാഹനങ്ങൾക്കും ഭാഗികമായി കേടുപാടുകൾ സംഭവിച്ചെങ്കിലും, യാത്രക്കാർ അത്ഭുതകരമായാണ് പരിക്കേൽക്കാതെ രക്ഷപ്പെട്ടത്.
പ്രതിഷേധത്തെ തുടർന്ന് പിരിവ് നിർത്തി, പക്ഷെ ദുരിതം ബാക്കി
ആരിക്കാടിയിൽ ടോൾ ബൂത്ത് സ്ഥാപിച്ച സമയത്ത് തന്നെ വിവിധ രാഷ്ട്രീയ-സാമൂഹിക സംഘടനകളുടെ നേതൃത്വത്തിൽ ശക്തമായ ജനകീയ സമരങ്ങൾ അരങ്ങേറിയിരുന്നു. ജനരോഷം ശക്തമായതോടെയാണ് മാസങ്ങൾക്ക് മുമ്പ് ഇവിടെ വാഹനങ്ങളിൽ നിന്നുള്ള പണം ഈടാക്കുന്നത് അധികൃതർ നിർത്തിവെച്ചത്. പിരിവ് നിർത്തിയതോടെ ടോൾ ബൂത്തിലെ ക്യാമറകൾ മാത്രമാണ് അധികൃതർ അഴിച്ചുമാറ്റിയത്. എന്നാൽ, വാഹനങ്ങൾ കടന്നുപോകാൻ നിർമ്മിച്ച നാല് ട്രാക്കുകളിലെയും അപകടകരമായ ഹമ്പുകളോ മറ്റ് സാമഗ്രികളോ ഇതുവരെയും പൊളിച്ചുമാറ്റിയിട്ടില്ല.
രാത്രിയാത്രക്കാർക്ക് വില്ലനായി ഹമ്പുകൾ
ടോൾ ബൂത്തിന്റെ പശ്ചാത്തലമില്ലാതെ പെട്ടെന്ന് പ്രത്യക്ഷപ്പെടുന്ന ഈ ഹമ്പുകൾ ദീർഘദൂര യാത്രക്കാർക്കും രാത്രികാലങ്ങളിൽ പോകുന്ന വാഹനങ്ങൾക്കും വലിയ കെണിയായി മാറിയിരിക്കുകയാണ്. വേഗതയിൽ വരുന്ന വാഹനങ്ങൾ പെട്ടെന്ന് ഹമ്പിൽ കയറി നിയന്ത്രണം വിടുന്നതും, പെട്ടെന്ന് ബ്രേക്കിടുമ്പോൾ പുറകിലെ വാഹനങ്ങൾ വന്നിടിക്കുന്നതും ഇവിടെ പതിവായിരിക്കുകയാണ്. ഇരുചക്ര വാഹനങ്ങളും ഓട്ടോറിക്ഷകളും ഇവിടെ മറിഞ്ഞ് അപകടത്തിൽപ്പെടുന്നത് നിത്യസംഭവമാണെന്ന് നാട്ടുകാർ സാക്ഷ്യപ്പെടുത്തുന്നു.
Leave a Reply