'വാട്ട് നെക്സ്റ്റ്?' സ്റ്റൈലൻ ലുക്കിൽ വീണ്ടും മമ്മൂക്ക, ആവേശം നിറച്ച് പുതിയ ചിത്രം

കൊച്ചി: മലയാളികളുടെ പ്രിയതാരം മമ്മൂട്ടിയുടെ സ്റ്റൈലൻ ലുക്കിലുള്ള ചിത്രങ്ങൾ എന്നും സോഷ്യൽ മീഡിയ ആഘോഷമാക്കി മാറ്റാറുണ്ട്. പലപ്പോഴും അപ്രതീക്ഷിതമായി എത്തുന്ന ഇത്തരം ലുക്കുകൾ നിമിഷങ്ങൾക്കകമാണ് സൈബർ ഇടങ്ങളിൽ തരംഗമാവുന്നത്. ഇപ്പോഴിതാ, താരത്തിന്റെ പിറന്നാളിന് തൊട്ടുമുമ്പായി പുറത്തുവന്ന പുതിയ ലുക്കും ആരാധകർ ഏറ്റെടുത്തിരിക്കുകയാണ്.

നിർമാതാവ് ആന്റോ ജോസഫാണ് മമ്മൂട്ടിയുടെ അതീവ സ്റ്റൈലിഷ് ലുക്കിലുള്ള പുതിയ ചിത്രം തന്റെ ഇൻസ്റ്റഗ്രാം പേജിലൂടെ പങ്കുവെച്ചത്. “വാട്ട് നെക്സ്റ്റ്…?” (What next…?) എന്ന ഒറ്റവരി അടിക്കുറിപ്പോടെയാണ് ആന്റോ ജോസഫ് ഈ ചിത്രം ആരാധകർക്കായി പങ്കുവെച്ചിരിക്കുന്നത്.

പോസ്റ്റ് പുറത്തുവന്ന് മിനിറ്റുകൾക്കകം തന്നെ ചിത്രത്തിന് താഴെ ലൈക്കുകളും കമന്റുകളുമായി ആരാധകരും സിനിമാ പ്രവർത്തകരും എത്തിക്കഴിഞ്ഞു. സംവിധായകൻ ജി. മാർത്താണ്ഡൻ ഉൾപ്പെടെയുള്ള പ്രമുഖരും ചിത്രത്തിന് പ്രതികരണവുമായി എത്തിയിട്ടുണ്ട്. എഴുപത്തിയഞ്ചാം പിറന്നാളിന്റെ നിറവിലേക്ക് കടക്കുന്ന താരരാജാവിന്റെ പുതിയ മേക്കോവർ ഏത് ചിത്രത്തിലേതാണ് എന്ന ആകാംക്ഷയിലാണ് സിനിമാ പ്രേമികൾ.

പിറന്നാൾ ദിനത്തിൽ മമ്മൂട്ടിയുടെ രണ്ട് വൻ പ്രോജക്ടുകളുടെ അപ്‌ഡേറ്റുകളാണ് ആരാധകർ ആകാംക്ഷയോടെ കാത്തിരിക്കുന്നത്. മമ്മൂട്ടി കമ്പനിയുടെ ഒൻപതാമത് ചിത്രമായി നിതീഷ് സഹദേവ് സംവിധാനം ചെയ്യുന്ന പുതിയ ആക്ഷൻ ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും തിങ്കളാഴ്ച പുലർച്ചെ 12:01-ന് പുറത്തുവിടും. മമ്മൂട്ടി കമ്പനി ഇതുവരെ നിർമ്മിച്ചതിൽ വെച്ച് ഏറ്റവും വലിയ ക്യാൻവാസിലൊരുങ്ങുന്ന ചിത്രമായിരിക്കും ഇതെന്നാണ് സൂചന.

ഇതിനുപുറമെ, രാജ്കുമാർ പെരിയസാമി സംവിധാനം ചെയ്ത് ധനുഷും മമ്മൂട്ടിയും ഒന്നിക്കുന്ന പാൻ-ഇന്ത്യൻ തമിഴ് ചിത്രമായ ‘ഓം’ (Om – Chapter One: Udhiram: The Blood Wood)-ലെ മമ്മൂട്ടിയുടെ കഥാപാത്രത്തെക്കുറിച്ചുള്ള വിവരങ്ങളും പിറന്നാൾ ദിനത്തിൽ പുറത്തുവിടും. ‘പേരൻപി’ന് ശേഷം നീണ്ട എട്ട് വർഷത്തെ ഇടവേള കഴിഞ്ഞ് മമ്മൂട്ടി വീണ്ടും തമിഴിലേക്ക് തിരിച്ചെത്തുന്ന ചിത്രം കൂടിയാണ് ‘ഓം’.

ഇരു ചിത്രങ്ങളുടെയും നിർണായക പ്രഖ്യാപനങ്ങൾ വരാനിരിക്കെയാണ് ആരാധകരുടെ ആവേശം ഇരട്ടിയാക്കി ആന്റോ ജോസഫിന്റെ പുതിയ ഇൻസ്റ്റഗ്രാം പോസ്റ്റ് എത്തിയിരിക്കുന്നത്.