കാസർകോട്: വലിയ അളവിൽ മാരക മയക്കുമരുന്നായ എംഡിഎംഎയും (MDMA) കഞ്ചാവും പിടികൂടിയ കേസിൽ ഒളിവിൽ കഴിഞ്ഞിരുന്ന ഒൻപതാം പ്രതി പൊലീസിന്റെ വലയിലായി. കാസർകോട് തളങ്കര ബാങ്കോട്ടെ ഷബീബബാഗ് ഹൗസിൽ മുഹമ്മദ് ലിസാൻ അലി (32) ആണ് അറസ്റ്റിലായത്.
കർണാടക മടിക്കേരി കുശാൽ നഗറിലെ ഒളിവു കേന്ദ്രത്തിൽ വച്ച് മഞ്ചേശ്വരം പൊലീസ് ഇൻസ്പെക്ടർ പി.കെ. ജിജീഷും സംഘവും ചേർന്നാണ് പ്രതിയെ കസ്റ്റഡിയിലെടുത്തത്. എഎസ്പി അശോക് അച്യുതന്റെ മേൽനോട്ടത്തിലായിരുന്നു പൊലീസ് നടപടി.
റെയ്ഡ് നടന്നത് ഉപ്പളയിൽ
2024 സെപ്തംബർ 20-ന് വൈകുന്നേരം 3.45-ഓടെയാണ് കേസിനാസ്പദമായ സംഭവം ഉണ്ടാകുന്നത്. രഹസ്യവിവരത്തെ തുടർന്ന് അന്നത്തെ മഞ്ചേശ്വരം ഇൻസ്പെക്ടർ പി.ജെ. ടോൾസന്റെ നേതൃത്വത്തിൽ ഉപ്പള പത്വാടിയിലെ അസ്കർ അലി (28) എന്നയാളുടെ വീട്ടിൽ നടത്തിയ തിരച്ചിലിലാണ് മയക്കുമരുന്ന് ശേഖരം കണ്ടെടുത്തത്.
- പിടിച്ചെടുത്തത്: 3.407 കിലോഗ്രാം എംഡിഎംഎയും 642 ഗ്രാം കഞ്ചാവും.
- പൊലീസ് നിരീക്ഷണം: അസ്കർ അലിയുടെ വീട്ടിലേക്ക് രാത്രികാലങ്ങളിൽ ഉൾപ്പെടെ അപരിചിതരായ ആളുകളും വാഹനങ്ങളും പതിവായി വന്നു പോകുന്നത് ശ്രദ്ധയിൽപ്പെട്ടതിനെ തുടർന്ന് ദിവസങ്ങളോളം നിരീക്ഷണം നടത്തിയ ശേഷമായിരുന്നു റെയ്ഡ്.
മയക്കുമരുന്ന് കടത്തിന് പണം ഇറക്കിയത് ലിസാൻ അലി
കേസിലെ ഒൻപതാം പ്രതിയായ മുഹമ്മദ് ലിസാൻ അലിയാണ് വൻതോതിലുള്ള ഈ മയക്കുമരുന്ന് ഇടപാടിനായി സാമ്പത്തിക സഹായം നൽകിയതെന്ന് പൊലീസ് വ്യക്തമാക്കുന്നു. ലഹരി കടത്തിന്റെ പ്രധാന കണ്ണികളിലൊരാളായ ഇയാൾ സംഭവം നടന്നതിനു ശേഷം ഒളിവിൽ കഴിയുകയായിരുന്നു. കർണാടക കേന്ദ്രീകരിച്ച് ഒളിവിൽ കഴിഞ്ഞിരുന്ന പ്രതിയെക്കുറിച്ച് കൃത്യമായ വിവരത്തിന്റെ അടിസ്ഥാനത്തിലാണ് മഞ്ചേശ്വരം പൊലീസ് കർണാടകയിലെത്തി പ്രതിയെ പിടികൂടിയത്.
Leave a Reply