കാസർകോട്: കേന്ദ്ര കാലാവസ്ഥാ വകുപ്പ് കാസർകോട് ജില്ലയിൽ അതിതീവ്രമഴ മുന്നറിയിപ്പായ റെഡ് അലർട്ട് പ്രഖ്യാപിച്ച പശ്ചാത്തലത്തിൽ, ജില്ലയിലുടനീളം മുൻകരുതൽ നടപടികൾ കർശനമാക്കി. പ്രശസ്തമായ റാണിപുരം ഹിൽസ്റ്റേഷനിലേയ്ക്കുള്ള വിനോദസഞ്ചാരം താത്കാലികമായി നിരോധിച്ചു. ഇതിനുപുറമേ, ജില്ലയിലെ ജലാശയങ്ങൾ കേന്ദ്രീകരിച്ചുള്ള എല്ലാത്തരം വിനോദ പ്രവർത്തനങ്ങൾക്കും പൂർണ്ണ നിരോധനം ഏർപ്പെടുത്തിയിട്ടുണ്ട്.
സുരക്ഷാ മുന്നൊരുക്കങ്ങളുടെ ഭാഗമായാണ് ഈ നടപടിയെന്ന് ജില്ലാ ഭരണകൂടവും അധികൃതരും അറിയിച്ചു.
നദികളിൽ ജലനിരപ്പ് ഉയരുന്നു; ജാഗ്രതയിൽ സേനകൾ
കാസർകോട് ജില്ലയിൽ കനത്ത മഴ നിലയ്ക്കാതെ തുടരുകയാണ്. വടക്കൻ പ്രദേശങ്ങളിൽ കനത്ത മഴയ്ക്കൊപ്പം ശക്തമായ കാറ്റും അനുഭവപ്പെടുന്നുണ്ട്. മഴ ശക്തമായതോടെ ജില്ലയിലെ പ്രധാന നദികളിലെല്ലാം ജലനിരപ്പ് വേഗത്തിൽ ഉയർന്നുകൊണ്ടിരിക്കുകയാണ്.
ഏതുതരത്തിലുള്ള അടിയന്തിര സാഹചര്യങ്ങളും നേരിടുന്നതിനായി ഫയർഫോഴ്സ് അടക്കമുള്ള ദുരന്തനിവാരണ സേനകൾ പൂർണ്ണ സജ്ജരായി രംഗത്തുണ്ട്. മലയോര മേഖലകളിലും പുഴയോരങ്ങളിൽ താമസിക്കുന്നവരും പ്രത്യേക ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
കണ്ണൂർ മലയോര മേഖലയിലും കനത്ത മഴ
അയൽജില്ലയായ കണ്ണൂരിന്റെ മലയോര മേഖലകളിലും കനത്ത മഴ തുടരുകയാണ്. പ്രദേശത്തെ പ്രധാന നദികളിലും പുഴകളിലും ജലനിരപ്പ് അപകടകരമായ രീതിയിൽ ഉയർന്നുകൊണ്ടിരിക്കുന്നതായാണ് റിപ്പോർട്ടുകൾ.
Leave a Reply