കാസർകോട് / പെരിന്തൽമണ്ണ: സമസ്ത കേരള ജംഇയ്യത്തുൽ ഉലമ ജനറൽ സെക്രട്ടറിയും കാസർകോട് സംയുക്ത മുസ്ലിം ജമാഅത്ത് ഖാസിയുമായ പ്രൊഫ. കെ. ആലിക്കുട്ടി മുസ്ലിയാർ (81) അന്തരിച്ചു. വാർധക്യസഹജമായ അസുഖങ്ങളെ തുടർന്ന് പെരിന്തൽമണ്ണയിലെ സ്വകാര്യ ആശുപത്രിയിൽ ചികിത്സയിലായിരുന്ന അദ്ദേഹത്തിന്റെ അന്ത്യം വ്യാഴാഴ്ച ഉച്ചയ്ക്ക് മൂന്നു മണിയോടെയാണ് സംഭവിച്ചത്.
സ്വദേശമായ മലപ്പുറം തിരൂർക്കാട്ടെ ജുമാമസ്ജിദ് ഖബർസ്ഥാനിൽ നാളെ (വെള്ളി) രാവിലെ ഖബറടക്കം നടക്കും.
2016 ഫെബ്രുവരി 27-ന് ചെറുശ്ശേരി സൈനുദ്ദീൻ മുസ്ലിയാരുടെ വിയോഗത്തെ തുടർന്നാണ് പ്രൊഫ. കെ. ആലിക്കുട്ടി മുസ്ലിയാർ സമസ്ത ജനറൽ സെക്രട്ടറിയായി ചുമതലയേൽക്കുന്നത്. അഖിലേന്ത്യ മുസ്ലിം വ്യക്തി നിയമബോർഡ് ദേശീയ സമിതിയംഗം, സമസ്ത വിദ്യാഭ്യാസ ബോർഡ് വൈസ് പ്രസിഡൻ്റ് (2009 മുതൽ) എന്നീ നിലകളിലും അദ്ദേഹം പ്രവർത്തിച്ചുവരികയായിരുന്നു.
2003 മുതൽ 2006 വരെ കേരള ഹജ്ജ് കമ്മിറ്റി ചെയർമാനായും, 2006 മുതൽ 2009 വരെ ഇന്ത്യാ ഹജ്ജ് കമ്മിറ്റി വൈസ് ചെയർമാനായും സേവനമനുഷ്ഠിച്ചു. ഒരു മന്ത്രിയല്ലാത്ത വ്യക്തി ആദ്യമായി ഹജ്ജ് കമ്മിറ്റി ചെയർമാൻ പദവിയിലെത്തുന്നത് ആലിക്കുട്ടി മുസ്ലിയാരുടെ നിയമനത്തിലൂടെയായിരുന്നു.
ജീവചരിത്രം ചുരുക്കത്തിൽ:
- ജനനം: 1945-ൽ മലപ്പുറം തിരൂർക്കാട് കുന്നത്ത് മൂസ ഹാജിയുടെയും മാടമ്പി ഇയ്യാത്തുട്ടിയുടെയും മകനായി.
- ഖത്തീബും ഖാസിയുമായി: 16-ാം വയസിൽ തിരൂർക്കാട് മഹല്ല് ഖത്തീബായും 20-ാം വയസിൽ മഹല്ല് ഖാസിയായും ചുമതലയേറ്റു.
- വിദ്യാഭ്യാസം: പട്ടിക്കാട് ജാമിഅ നൂരിയ്യ അറബിക് കോളേജിൽ നിന്ന് ഫൈസി ബിരുദം നേടി.
- അധ്യാപന രംഗത്ത്: മീനാർകുഴി ദർസിലായിരുന്നു ആദ്യ സേവനം. 1979-ൽ ശംസുൽ ഉലമയുടെ ഒഴിവിൽ പട്ടിക്കാട് ജാമിഅ നൂരിയയിൽ അധ്യാപകനായും, 2003 മുതൽ അവിടെ പ്രിൻസിപ്പലായും നിയമിതനായി.
- കാസർകോട്ടെ സേവനം: 2013 മുതൽ കാസർകോട് സംയുക്ത ഖാസിയായി പ്രവർത്തിച്ചുവരികയായിരുന്നു.
സമസ്തയുടെയും വിവിധ ഇസ്ലാമിക പ്രസ്ഥാനങ്ങളുടെയും വളർച്ചയിൽ നിർണായക പങ്കുവഹിച്ച അദ്ദേഹത്തിന്റെ വിയോഗത്തിൽ പ്രമുഖ നേതാക്കളും പണ്ഡിതന്മാരും അനുശോചനം രേഖപ്പെടുത്തി.
Leave a Reply