നീലേശ്വരം: ദേശീയപാത 66 വികസനത്തിന്റെ ഭാഗമായി നീലേശ്വരത്ത് നടക്കുന്ന അശാസ്ത്രീയ റോഡ് നിർമ്മാണത്തിനെതിരെയും അധികൃതരുടെ അവഗണനയിലും പ്രതിഷേധിച്ച് ജനകീയ സമരസമിതി വീണ്ടും പ്രക്ഷോഭത്തിലേക്ക്. അനിശ്ചിതകാല സമരത്തിന്റെ 126-ാം ദിനമായ ജൂലൈ 26 ഞായറാഴ്ച ജനകീയ സമരസമിതിയുടെ നേതൃത്വത്തിൽ സമൂഹ നിരാഹാരം സംഘടിപ്പിക്കും. രാവിലെ 9 മണി മുതൽ വൈകിട്ട് 5 മണി വരെയാണ് സമരം. നീലേശ്വരം പ്രസ്സ് ഫോറത്തിൽ വിളിച്ചുചേർത്ത വാർത്താ സമ്മേളനത്തിലാണ് ഭാരവാഹികൾ ഇക്കാര്യം അറിയിച്ചത്.
എൻ.എച്ച്.എ.ഐയുടെ ഇരട്ടത്താപ്പെന്ന് ആരോപണം
മയിച്ച, പെരുമ്പ, കുപ്പം തുടങ്ങിയ പ്രദേശങ്ങളിൽ മണ്ണിന്റെ ഘടന എമ്പാങ്ക്മെന്റ് (ഉയർത്തിയ മൺതിട്ട) നിർമ്മാണത്തിന് അനുയോജ്യമല്ലെന്ന് കണ്ടെത്തി നിലവിലുള്ള റോഡ് പൊളിച്ചുമാറ്റി ആകാശ പാത (Elevated Flyover) നിർമ്മിക്കാൻ ദേശീയപാത അതോറിറ്റി (NHAI) നിർദ്ദേശം നൽകിയിരുന്നു. എന്നാൽ, ഇതേ ഭൗമശാസ്ത്രപരമായ സാഹചര്യമുള്ള നീലേശ്വരത്ത് സുരക്ഷാ മാനദണ്ഡങ്ങൾ പരിഗണിക്കാതെ മൺതിട്ട നിർമ്മിക്കുന്നത് എൻ.എച്ച്.എ.ഐയുടെ ഇരട്ടത്താപ്പാണെന്ന് സമരസമിതി ആരോപിക്കുന്നു.
15 മീറ്റർ ആഴത്തിൽ കളിമണ്ണ്; കൂറ്റൻ അപകടഭീഷണി
നീലേശ്വരത്ത് നടത്തിയ സോയിൽ ടെസ്റ്റിംഗ് ഡാറ്റ പ്രകാരം 15 മീറ്റർ ആഴത്തിൽ വരെ ഉറപ്പില്ലാത്ത കളിമണ്ണിന്റെ (loose clayey soil) സാന്നിധ്യമുണ്ട്. കൂറ്റൻ മൺതിട്ടയുടെയും അതിലൂടെ കടന്നുപോകുന്ന ഭാരമേറിയ വാഹനങ്ങളുടെയും സമ്മർദ്ദം താങ്ങാൻ ഈ മണ്ണിനാകില്ല. ഇത് സമീപത്തെ കെട്ടിടങ്ങൾക്കും സ്കൂൾ വിദ്യാർത്ഥികൾക്കും പ്രദേശവാസികൾക്കും വലിയ അപകടസാധ്യതയാണ് സൃഷ്ടിക്കുന്നത്. അതിനാൽ ശാസ്ത്രീയമായ സുരക്ഷാ മാനദണ്ഡങ്ങൾ പാലിച്ച് നീലേശ്വരത്തും ഫ്ലൈഓവർ നിർമ്മിക്കണമെന്നാണ് പ്രദേശവാസികളുടെ പ്രധാന ആവശ്യം.
സമര പരിപാടികൾ ശക്തമാക്കുന്നു
- ജൂലൈ 25 (ശനി): വൈകിട്ട് 6 മണിക്ക് കോൺവെൻ്റ് ജംഗ്ഷനിൽ നിന്നും മാർക്കറ്റിലേക്ക് വിളമ്പര ജാഥ.
- ജൂലൈ 26 (ഞായർ): രാവിലെ 9 മുതൽ വൈകിട്ട് 5 വരെ സമൂഹ നിരാഹാര സമരം.
- ജൂലൈ 30 (വ്യാഴം): ആവശ്യങ്ങൾ അംഗീകരിച്ചില്ലെങ്കിൽ 130-ാം ദിനത്തിൽ കണ്ണൂർ എൻ.എച്ച്.എ.ഐ ഓഫീസിലേക്ക് മാർച്ചും ധർണ്ണയും.
വാർത്താ സമ്മേളനത്തിൽ ജനകീയ സമരസമിതി ചെയർമാൻ ശ്രീനാഥ് ശശി ടി.സി.വി, ജനറൽ കൺവീനർ ഡി. രാജൻ, ട്രഷറർ മഹമ്മൂദ് കോട്ടായി, വൈസ് ചെയർമാൻ ജയരാജൻ കെ.പി, കൺവീനർ പ്രകാശൻ കൊട്ടറ, എക്സിക്യൂട്ടീവ് അംഗങ്ങളായ രാജു പി. (റിട്ട. എസ്.പി.), കൈപ്പാട്ടിൽ വിജയൻ തുടങ്ങിയവർ പങ്കെടുത്തു.
Leave a Reply