കാഞ്ഞങ്ങാട്: ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കും മറ്റ് കോൺഗ്രസ് നേതാക്കൾക്കുമെതിരെ നടപ്പിലാക്കിയ പൊലീസ് നടപടിയിൽ പ്രതിഷേധിച്ച് കാഞ്ഞങ്ങാട്ട് കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും റോഡ് ഉപരോധവും സംഘടിപ്പിച്ചു.
കാഞ്ഞങ്ങാട് ബസ് സ്റ്റാൻഡ് പരിസരത്തുനിന്ന് ആരംഭിച്ച പ്രതിഷേധ മാർച്ച് പുതിയകോട്ട ഹെഡ് പോസ്റ്റ് ഓഫീസിന് മുന്നിൽ അവസാനിച്ചു. തുടർന്ന് പ്രവർത്തകർ പോസ്റ്റ് ഓഫീസും തൊട്ടടുത്തുള്ള സംസ്ഥാനപാതയും ഉപരോധിക്കുകയായിരുന്നു. ഉപരോധത്തെ തുടർന്ന് പാതയിൽ ഇരുവശങ്ങളിലേക്കുമുള്ള വാഹനഗതാഗതം താൽക്കാലികമായി തടസ്സപ്പെട്ടു.
പൊലീസും പ്രതിഷേധക്കാരും തമ്മിൽ ഉന്തും തള്ളും
റോഡിൽ കുത്തിയിരുന്ന് പ്രതിഷേധിച്ച പ്രവർത്തകരെ നീക്കം ചെയ്യാൻ പൊലീസ് ശ്രമിച്ചതോടെ സ്ഥലത്ത് പൊലീസും പ്രവർത്തകരും തമ്മിൽ ഉന്തുംതള്ളുമുണ്ടായി. ഉപരോധം നീളുമെന്ന സ്ഥിതി വന്നതോടെ പൊലീസെത്തി പ്രതിഷേധക്കാരെ റോഡിൽ നിന്നും മാറ്റി അറസ്റ്റ് ചെയ്തു നീക്കി. തുടർന്നാണ് സംസ്ഥാനപാതയിലെ ഗതാഗതം പൂർവ്വസ്ഥിതിയിലായത്.
പ്രതിപക്ഷ നേതാക്കൾക്കെതിരെയുള്ള നടപടിക്കെതിരെ രാജ്യത്തുടനീളം നടക്കുന്ന പ്രതിഷേധങ്ങളുടെ ഭാഗമായാണ് കാഞ്ഞങ്ങാട്ടും സമരം സംഘടിപ്പിച്ചത്. പ്രതിഷേധത്തിൽ കോൺഗ്രസ് ജില്ലാ-ബ്ലോക്ക്-മണ്ഡലം ഭാരവാഹികളും കെ.എസ്.യു, യൂത്ത് കോൺഗ്രസ്, മഹിളാ കോൺഗ്രസ് തുടങ്ങിയ പോഷക സംഘടനാ പ്രവർത്തകരും പങ്കെടുത്തു. അനിഷ്ട സംഭവങ്ങൾ ഒഴിവാക്കാൻ സ്ഥലത്ത് വൻ പൊലീസ് സന്നാഹം വിന്യസിച്ചിരുന്നു.
Leave a Reply