കണ്ണൂർ: പയ്യന്നൂരിൽ ചികിത്സാ പിഴവിനെത്തുടർന്ന് ഒന്നര വയസുകാരൻ ദേവാൻഷ് ശൗര്യ മരിച്ച സംഭവത്തിൽ ചികിത്സിച്ച ഡോക്ടർമാർക്ക് ഗുരുതര വീഴ്ച സംഭവിച്ചതായി അഞ്ചംഗ മെഡിക്കൽ ബോർഡിന്റെ കണ്ടെത്തൽ. പയ്യന്നൂരിലെ സ്വകാര്യ ആശുപത്രിയിൽ നടന്ന ഈ ദാരുണ സംഭവത്തിൽ കുറ്റക്കാരായ ഡോക്ടർമാർക്കെതിരെ കർശനമായ ക്രിമിനൽ കുറ്റം ചുമത്തി നടപടികളുമായി മുന്നോട്ടുപോകണമെന്ന് മെഡിക്കൽ ബോർഡ് ശുപാർശ ചെയ്തു.
എരമം സ്വദേശികളായ സൂരജിൻ്റെയും വിജിഷയുടെയും ഏകമകൻ, ഒരു വർഷവും അഞ്ചുമാസവും പ്രായമുള്ള ദേവാൻഷ് ശൗര്യയാണ് കഴിഞ്ഞദിവസം മരണപ്പെട്ടത്. കുഞ്ഞിന് അനസ്തേഷ്യ നൽകിയതിൽ ആശുപത്രി അധികൃതരുടെ ഭാഗത്തുനിന്നും അതീവ ഗുരുതരമായ കാലതാമസം ഉണ്ടായതായി ബോർഡിന്റെ റിപ്പോർട്ടിൽ പ്രത്യേകം ചൂണ്ടിക്കാണിക്കുന്നു.
അനസ്തേഷ്യ നൽകുമ്പോഴേക്കും മുറിവ് ഉണങ്ങിയിരുന്നു!
രാവിലെ 10:15-ഓടെ ആശുപത്രിയിൽ പ്രവേശിപ്പിച്ച കുട്ടിക്ക് വൈകുന്നേരത്തോടെയാണ് അനസ്തേഷ്യ നൽകിയത്. ഇത്രയും സമയം വൈകിയത് എന്തുകൊണ്ടെന്ന ചോദ്യത്തിന് തൃപ്തികരമായ മറുപടി നൽകാൻ ആശുപത്രി അധികൃതർക്ക് കഴിഞ്ഞിട്ടില്ല.
കൂടാതെ, വൈകുന്നേരമായപ്പോഴേക്കും കുട്ടിയുടെ ചുണ്ടിലെ മുറിവ് സ്വാഭാവികമായി ഭേദപ്പെട്ടുവരികയായിരുന്നു എന്നും ആ സമയത്ത് അനസ്തേഷ്യ നൽകുകയോ ശസ്ത്രക്രിയ നടത്തുകയോ ചെയ്യേണ്ട യാതൊരു സാഹചര്യവും ഉണ്ടായിരുന്നില്ലെന്നും മെഡിക്കൽ ബോർഡ് വിലയിരുത്തി.
അഞ്ചംഗ മെഡിക്കൽ ബോർഡിലെ മൂന്ന് അംഗങ്ങൾ ഡോക്ടർമാരുടെ ഭാഗത്തുനിന്ന് വ്യക്തമായ അനാസ്ഥ ഉണ്ടായതായി റിപ്പോർട്ടിൽ എഴുതി ഒപ്പിട്ടു. ഒരു അംഗം ചികിത്സാ പിഴവില്ലെന്ന് വാദിച്ചപ്പോൾ, മറ്റൊരു അംഗം പ്രത്യേക അഭിപ്രായമൊന്നും രേഖപ്പെടുത്താതെ മാറിനിൽക്കുകയാണുണ്ടായത്. എന്നാൽ, കൃത്യസമയത്ത് ശരിയായ രീതിയിലുള്ള ഇടപെടൽ ഉണ്ടായിരുന്നെങ്കിൽ കുഞ്ഞിന്റെ ജീവൻ രക്ഷിക്കാമായിരുന്നു എന്നാണ് മെഡിക്കൽ ബോർഡ് രേഖകളിൽ നിന്നും വ്യക്തമാകുന്നത്.
ശക്തമായ വകുപ്പുകളുമായി പോലീസ് അന്വേഷണം
അനസ്തേഷ്യ നൽകിയതിന് പിന്നാലെ തലച്ചോറിലേക്കുള്ള ഓക്സിജൻ പ്രവാഹം നിലച്ചതാണ് മരണകാരണമെന്ന് പോസ്റ്റ്മോർട്ടം റിപ്പോർട്ടിലും കണ്ടെത്തിയിരുന്നു. ആറുവർഷത്തെ നീണ്ട കാത്തിരിപ്പിനൊടുവിൽ ഐവിഎഫ് ചികിത്സയിലൂടെ മാതാപിതാക്കൾക്ക് ലഭിച്ച ഏക മകനാണ് നഷ്ടപ്പെട്ടത്.
ഇതോടെ ചികിത്സാപ്പിഴവുമായി ബന്ധപ്പെട്ട ശക്തമായ വകുപ്പുകൾ പ്രകാരം പോലീസിന്റെ ഭാഗത്തുനിന്ന് വിശദമായ അന്വേഷണം ഊർജ്ജിതമാക്കിയിട്ടുണ്ട്. പുതിയ ആശുപത്രി സംരക്ഷണ നിയമത്തിലെ ചട്ടങ്ങളും രോഗികളുടെ അവകാശങ്ങളും മുൻനിർത്തി കുറ്റക്കാരായ ഡോക്ടർമാർക്കെതിരെ കർശന നടപടി സ്വീകരിക്കുമെന്ന് പോലീസ് അറിയിച്ചു. സ്വകാര്യ മേഖലയിലെ സ്ഥാപനമായതിനാൽ സർക്കാർ തലത്തിലും പോലീസിൻ്റെ ഭാഗത്തുനിന്നും വിട്ടുവീഴ്ചയില്ലാത്ത നടപടികളുണ്ടാകും.
Leave a Reply