പത്തനംതിട്ട: അടൂരിൽ യുവതിയെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയ സംഭവത്തിൽ ആൺസുഹൃത്തിനെ പോലീസ് അറസ്റ്റ് ചെയ്തു. ഏഴംകുളം സ്വദേശിയായ അരുൺ ആണ് അടൂർ പോലീസിന്റെ പിടിയിലായത്. ആത്മഹത്യാ പ്രേരണാ കുറ്റം ചുമത്തിയാണ് ഇയാൾക്കെതിരെ കേസെടുത്തിരിക്കുന്നത്.
അടൂർ കോട്ടമുകൾ സ്വദേശിനിയായ ഷെഹന (31) യെയാണ് കഴിഞ്ഞ ദിവസം വീടിനുള്ളിലെ സ്റ്റെയർകേസിൽ തൂങ്ങിമരിച്ച നിലയിൽ കണ്ടെത്തിയത്. സംഭവസമയം വീടിനുള്ളിൽ ഉണ്ടായിരുന്ന അരുണിനെ അന്നുതന്നെ പോലീസ് കസ്റ്റഡിയിലെടുത്തിരുന്നു. തുടർന്ന് നടത്തിയ വിശദമായ ചോദ്യം ചെയ്യലിനൊടുവിലാണ് ഇപ്പോൾ അറസ്റ്റ് രേഖപ്പെടുത്തിയിരിക്കുന്നത്.
നാട്ടുകാർ ബഹളം കേട്ടു, പിന്നാലെ കൗൺസിലർ എത്തി
കഴിഞ്ഞ തിങ്കളാഴ്ച രാത്രി ഏഴു മണിയോടെയായിരുന്നു സംഭവം. ഭർത്താവുമായി അകന്നു കഴിയുകയായിരുന്ന ഷെഹനയുടെ വീട്ടിൽ നിന്നും വലിയ രീതിയിൽ ബഹളം കേട്ടതിനെ തുടർന്നാണ് നാട്ടുകാർ ഓടിക്കൂടിയത്. തുടർന്ന് നാട്ടുകാർ അടൂർ നഗരസഭാ കൗൺസിലറെ വിവരമറിയിക്കുകയായിരുന്നു.
സ്ഥലത്തെത്തിയ കൗൺസിലർ വീടിനുള്ളിൽ ഉണ്ടായിരുന്ന അരുണിനോട് കതക് തുറക്കാൻ ആവശ്യപ്പെട്ടു. കതക് തുറന്ന് അകത്തുകയറി നടത്തിയ പരിശോധനയിലാണ് ഷെഹനയെ സ്റ്റെയർകേസിൽ തൂങ്ങിയ നിലയിൽ കണ്ടെത്തിയത്. ഉടൻ തന്നെ പോലീസിൽ വിവരമറിയിക്കുകയും സ്ഥലത്തെത്തിയ പോലീസ് സംഘം അരുണിനെ കസ്റ്റഡിയിലെടുക്കുകയുമായിരുന്നു.
ശരീരത്തിൽ രക്തപാടുകൾ; പോസ്റ്റ്മോർട്ടത്തിൽ നിർണായക കണ്ടെത്തൽ
മരണത്തിൽ ആദ്യഘട്ടത്തിൽ ചില ദുരൂഹതകൾ ഉയർന്നിരുന്നു. മരിച്ച ഷെഹനയുടെയും സുഹൃത്തായ അരുണിന്റെയും ശരീരത്തിൽ രക്തപാടുകൾ കണ്ടെത്തിയതാണ് സംശയങ്ങൾക്ക് ഇടയാക്കിയത്. തുടർന്ന് നടത്തിയ ഇൻക്വസ്റ്റ് നടപടികൾക്കും പോസ്റ്റ്മോർട്ടത്തിനും ഒടുവിലാണ് മരണം തൂങ്ങിമരണമാണ് എന്ന് സ്ഥിരീകരിച്ചത്.
ഇതോടെയാണ് മരണത്തിലേക്ക് നയിച്ച സാഹചര്യങ്ങളെക്കുറിച്ച് പോലീസ് അന്വേഷിച്ചതും, ആത്മഹത്യാ പ്രേരണാ കുറ്റത്തിന് അരുണിനെ അറസ്റ്റ് ചെയ്തതും. കേസിൽ കൂടുതൽ അന്വേഷണം പുരോഗമിക്കുകയാണെന്ന് അടൂർ പോലീസ് വ്യക്തമാക്കി.
Leave a Reply