കാസർഗോഡ്: കടലിൽ മത്സ്യബന്ധനത്തിനിടെ എഞ്ചിൻ തകരാറിലായി വള്ളത്തിൽ കുടുങ്ങിപ്പോയ നാല് മത്സ്യത്തൊഴിലാളികളെ ഫിഷറീസ് വകുപ്പും കുമ്പള തീരദേശ പോലീസും ചേർന്ന് സാഹസികമായി രക്ഷപ്പെടുത്തി. ശക്തമായ കാറ്റിലും തിരമാലയിലും പെട്ട് നിയന്ത്രണം നഷ്ടപ്പെട്ട വള്ളത്തിൽ നിന്നാണ് തൊഴിലാളികളെ സുരക്ഷിതമായി കരയ്ക്കെത്തിച്ചത്.
തുടക്കം ഉപ്പള മൂസോടിയിൽ നിന്ന്
ഞായറാഴ്ച പുലർച്ചെയായിരുന്നു സംഭവം. ഉപ്പള മൂസോടി തുറമുഖത്തുനിന്ന് മത്സ്യബന്ധനത്തിനായി കടലിലേക്ക് പുറപ്പെട്ട ‘ഗുത്തിയാമ്മ ഭഗവതി’ എന്ന ചെറിയ എഞ്ചിൻ ഘടിപ്പിച്ച വള്ളമാണ് അപകടത്തിൽപ്പെട്ടത്. ഉപ്പള മൂസോടി സ്വദേശിയായ വിക്രമിന്റെ ഉടമസ്ഥതയിലുള്ളതാണ് ഈ വള്ളം.
മഞ്ചേശ്വരം കടൽ തീരത്തുനിന്ന് ഏകദേശം 10 നോട്ടിക്കൽ മൈൽ അകലെ വെച്ചാണ് വള്ളത്തിന്റെ എഞ്ചിൻ പെട്ടെന്ന് പ്രവർത്തനരഹിതമാകുന്നത്. തുടർന്ന് കടലിൽ ശക്തമായ തിരമാലയും കാറ്റും രൂപപ്പെട്ടതോടെ വള്ളത്തിന്റെ നിയന്ത്രണം പൂർണ്ണമായും നഷ്ടപ്പെടുകയായിരുന്നു.
ജീവൻ പണയം വെച്ച് രക്ഷാദൗത്യം
അപകടസാഹചര്യം തിരിച്ചറിഞ്ഞ വള്ളത്തിലുണ്ടായിരുന്ന തൊഴിലാളികൾ ഉടൻ തന്നെ കുമ്പള തീരദേശ പോലീസിനെ വിവരമറിയിക്കുകയായിരുന്നു. സന്ദേശം ലഭിച്ചയുടൻ തീരദേശ പോലീസും ഫിഷറീസ് റെസ്ക്യൂ ടീം അംഗങ്ങളും രക്ഷാബോട്ടുമായി സംഭവസ്ഥലത്തേക്ക് തിരിച്ചു.
കടൽ അതീവ പ്രക്ഷുബ്ധമായ സാഹചര്യത്തിലും ജീവനക്കാർ നടത്തിയ കൃത്യമായ രക്ഷാപ്രവർത്തനത്തിനൊടുവിൽ വള്ളത്തിലുണ്ടായിരുന്ന നാല് മത്സ്യത്തൊഴിലാളികളെയും സുരക്ഷിതമായി രക്ഷപ്പെടുത്തി കോസ്റ്റൽ പോലീസിന്റെ ബോട്ടിലേക്ക് മാറ്റി. അപകടത്തിൽ ആർക്കും പരിക്കുകളൊന്നും സംഭവിച്ചിട്ടില്ല. തകരാറിലായ വള്ളം പിന്നീട് റെസ്ക്യൂ ബോട്ടുപയോഗിച്ച് കെട്ടിവലിച്ച് മൂസോടി ഹാർബറിലേക്ക് സുരക്ഷിതമായി എത്തിച്ചു.
മത്സ്യത്തൊഴിലാളികൾക്ക് കർശന ജാഗ്രതാ നിർദ്ദേശം
നിലവിൽ കടലിൽ പ്രതികൂല കാലാവസ്ഥയാണ് നിലനിൽക്കുന്നത്. അതിനാൽ കാലാവസ്ഥാ മുന്നറിയിപ്പുകൾ മത്സ്യത്തൊഴിലാളികൾ കർശനമായി പാലിക്കണമെന്ന് അധികൃതർ ആവശ്യപ്പെട്ടു. മോശം കാലാവസ്ഥയുള്ള സാഹചര്യങ്ങളിൽ ഒരു കാരണവശാലും കടലിൽ പോകരുതെന്നും ഫിഷറീസ് വകുപ്പും തീരദേശ പോലീസും മുന്നറിയിപ്പ് നൽകി.
Leave a Reply