പത്ത് വർഷത്തെ കാത്തിരിപ്പ്; മജൽ ഗ്രാമത്തിൻ്റെ യാത്രാദുരിതത്തിന് പരിഹാരം തേടി ഗതാഗത മന്ത്രിക്ക് നിവേദനം നൽകി

കാസർകോട്: കഴിഞ്ഞ ഒരു പതിറ്റാണ്ടായി തുടരുന്ന മൊഗ്രാൽ പുത്തൂർ ഗ്രാമപഞ്ചായത്തിലെ മജൽ ഗ്രാമവാസികളുടെ രൂക്ഷമായ യാത്രാപ്രശ്നത്തിന് ശാശ്വത പരിഹാരം കാണണമെന്ന് ആവശ്യപ്പെട്ട് ഗതാഗത മന്ത്രി സി.പി. ജോണിന് നിവേദനം നൽകി. മൊഗ്രാൽ പുത്തൂർ ഗ്രാമപഞ്ചായത്ത് വൈസ് പ്രസിഡന്റ് അർഫാന നജീബിന്റെ നേതൃത്വത്തിൽ കാഞ്ഞങ്ങാട് വെച്ചാണ് മന്ത്രിയെ നേരിൽ കണ്ട് പരാതി കൈമാറിയത്.

ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ഫൗസിയ സൈനുദ്ദീൻ, ക്ഷേമ കാര്യ സ്റ്റാൻഡിങ് കമ്മിറ്റി ചെയർപേഴ്സൺ മാഷിദ മുഹമ്മദ്‌, കോൺഗ്രസ് മണ്ഡലം പ്രസിഡന്റ് വേലായുധൻ യു എന്നിവരും നിവേദക സംഘത്തിൽ ഉണ്ടായിരുന്നു.

സർവീസ് നിർത്തിയിട്ട് 10 വർഷം; ജനങ്ങൾ ദുരിതത്തിൽ

കാസർകോട് പഴയ ബസ്‌സ്റ്റാൻഡ് – ചൗക്കി – അരിജാൽ – മജൽ – ബെള്ളൂർ – കമ്പാർ റൂട്ടിൽ 2016 വരെ കെ.എസ്.ആർ.ടി.സി സർവീസ് നടത്തിയിരുന്നു. എന്നാൽ ഇത് നിർത്തലാക്കിയതോടെയാണ് പ്രദേശവാസികൾ വലിയ യാത്രാദുരിതത്തിലായത്. കഴിഞ്ഞ പത്ത് വർഷത്തിനിടയിൽ ഈ പ്രദേശങ്ങളിൽ ജനസംഖ്യയും വീടുകളും വൻതോതിൽ വർദ്ധിച്ചിട്ടും, പൊതുഗതാഗത സൗകര്യം പുനഃസ്ഥാപിക്കാൻ അധികൃതർ ഇതുവരെ തയ്യാറായിട്ടില്ല. വിദ്യാർത്ഥികളും പ്രായമായവരും അടക്കമുള്ള നൂറുകണക്കിന് യാത്രക്കാരാണ് നിലവിൽ ഇതുമൂലം വലയുന്നത്.

സ്വകാര്യ ബസിന് പെർമിറ്റ് നിഷേധിച്ച് ആർ.ടി.ഒ

നാട്ടുകാരുടെ ദുരിതം മനസ്സിലാക്കി ഒരു സ്വകാര്യ സംരംഭകൻ ലക്ഷങ്ങൾ മുടക്കി പുതിയ ബി.എസ്-6 (BS6) ബസ് വാങ്ങി ഈ റൂട്ടിൽ സർവീസ് നടത്താൻ മുന്നോട്ട് വന്നിരുന്നു. എന്നാൽ, ഈ റൂട്ടിൽ കൃത്യമായ പെർമിറ്റ് നൽകാൻ മോട്ടോർ വാഹന വകുപ്പ് (RTO) തയ്യാറാകുന്നില്ലെന്ന് മന്ത്രിക്ക് നൽകിയ നിവേദനത്തിൽ വ്യക്തമാക്കുന്നു.

കെ.എസ്.ആർ.ടി.സി നിലവിൽ സർവീസ് നടത്താത്ത, വളഞ്ഞുപുളഞ്ഞ ദൂരമേറിയ വഴികളിലൂടെ സർവീസ് നടത്താനാണ് ആർ.ടി.ഒ നിർദ്ദേശിക്കുന്നത്. ഇത് യാത്രക്കാർക്ക് വൻ സമയനഷ്ടമുണ്ടാക്കുമെന്നും ബസ് ഉടമയ്ക്ക് വലിയ സാമ്പത്തിക ബാധ്യത മാത്രമേ വരുത്തിവെക്കൂ എന്നും പഞ്ചായത്ത് വൈസ് പ്രസിഡന്റ് അർഫാന നജീബ് ചൂണ്ടിക്കാട്ടി.

അടിയന്തര ഇടപെടൽ വേണമെന്ന് ആവശ്യം

പൊതുജനങ്ങളുടെ യാത്രാസൗകര്യം മുൻനിർത്തി വിഷയത്തിൽ ഗതാഗത മന്ത്രി അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം. ഒന്നുകിൽ കെ.എസ്.ആർ.ടി.സി ഈ റൂട്ടിൽ നേരിട്ട് പുനഃസർവീസ് ആരംഭിക്കുക, അല്ലെങ്കിൽ സ്വകാര്യ ബസ് ഉടമയ്ക്ക് നാട്ടുകാർക്ക് ഉപകാരപ്പെടുന്ന യഥാർത്ഥ റൂട്ടിൽ സർവീസ് നടത്താൻ ആവശ്യമായ പെർമിറ്റ് അടിയന്തരമായി ലഭ്യമാക്കുക എന്നീ ആവശ്യങ്ങളാണ് നിവേദനത്തിലൂടെ പ്രധാനമായും ഉന്നയിച്ചിരിക്കുന്നത്. വിഷയത്തിൽ അനുകൂലമായ നടപടിയുണ്ടാകുമെന്ന് മന്ത്രി ഉറപ്പുനൽകിയതായും ഭാരവാഹികൾ അറിയിച്ചു.