കാസർകോട്: തായന്നൂരിലെ സിപിഎം ലോക്കൽ കമ്മിറ്റി ഓഫീസ് ആക്രമിച്ച സംഭവത്തിൽ രണ്ട് ബിജെപി പ്രവർത്തകരെ അമ്പലത്തറ പൊലീസ് അറസ്റ്റ് ചെയ്തു. എണ്ണപ്പാറ സ്വദേശി വിശാൽ ബാബു (21), പറക്കളായി തോണിക്കല്ല് സ്വദേശി അഭിനവ് (22) എന്നിവരെയാണ് പൊലീസ് പിടികൂടിയത്.
കഴിഞ്ഞ ബുധനാഴ്ച പുലർച്ചെയായിരുന്നു തായന്നൂരിലെ സിപിഎം ഓഫീസിന് നേരെ ആക്രമണമുണ്ടായത്. ഓഫീസിന്റെ ജനൽ ചില്ലുകളും മുറ്റത്തുണ്ടായിരുന്ന കൊടിമരങ്ങളും അക്രമികൾ തകർത്തിരുന്നു. പ്രദേശത്ത് ബോധപൂർവ്വം സംഘർഷമുണ്ടാക്കാനുള്ള ശ്രമമാണ് നടക്കുന്നതെന്നും ആക്രമണത്തിന് പിന്നിൽ ബിജെപിയാണെന്നും സിപിഎം നേതൃത്വം ആരോപിച്ചിരുന്നു.
പ്രതികളെ കുടുക്കിയത് സിസിടിവി ദൃശ്യങ്ങളും ആശുപത്രിയിലെ ചികിത്സയും
സംഭവത്തിൽ കേസെടുത്ത് അന്വേഷണം ആരംഭിച്ച പൊലീസ്, പ്രതികൾ സ്കൂട്ടറിൽ സഞ്ചരിക്കുന്നതിന്റെ സിസിടിവി ദൃശ്യങ്ങൾ ശേഖരിച്ചിരുന്നു. ആക്രമണത്തിനിടെ പ്രതികളിൽ ഒരാൾക്ക് പരിക്കേറ്റിരുന്നു. ഇയാൾ ആശുപത്രിയിൽ ചികിത്സ തേടിയെത്തിയ വിവരമറിഞ്ഞ് പൊലീസ് സ്ഥലത്തെത്തി കസ്റ്റഡിയിലെടുക്കുകയായിരുന്നു. തുടർന്ന് നടത്തിയ ചോദ്യം ചെയ്യലിൽ പ്രതികൾ കുറ്റം സമ്മതിച്ചു.
അമ്പലത്തറ എസ്.ഐ എം.വി. പ്രകാശന്റെ നേതൃത്വത്തിലുള്ള പൊലീസ് സംഘമാണ് പ്രതികളെ പിടികൂടിയത്. അറസ്റ്റിലായവർ ബിജെപി പ്രവർത്തകരാണെന്ന് പൊലീസ് സ്ഥിരീകരിച്ചു. പ്രതികളെ കോടതിയിൽ ഹാജരാക്കി.
Leave a Reply