കാസർകോട്: സംസ്ഥാന പോലീസ് തലപ്പത്ത് സർക്കാർ നടത്തിയ വൻ അഴിച്ചുപണിയിൽ ഉത്തരമലബാറിന് നിർണായക മാറ്റങ്ങൾ. നിലവിലെ കാസർകോട് ജില്ലാ പോലീസ് മേധാവി ബി.വി. വിജയ ഭാരത് റെഡ്ഡി ഐപിഎസിനെ പുതിയ കണ്ണൂർ സിറ്റി പോലീസ് കമ്മീഷണറായി നിയമിച്ചു. കാസർകോട് ജില്ലയിലെ മികച്ച പ്രവർത്തന പരിചയവുമായാണ് വിജയ ഭാരത് റെഡ്ഡി കണ്ണൂർ സിറ്റിയുടെ ക്രമസമാധാന ചുമതലയിലേക്ക് മാറുന്നത്.
വിജയ ഭാരത് റെഡ്ഡി കണ്ണൂരിലേക്ക് മാറുന്നതോടെ ഒഴിവുവരുന്ന കാസർകോട് ജില്ലാ പോലീസ് മേധാവി സ്ഥാനത്തേക്ക് നിധിൻരാജ് ഐപിഎസിനെ പുതിയതായി നിയമിച്ചു. അതിർത്തി ജില്ലയായ കാസർകോടിന്റെ ക്രമസമാധാന പാലന ചുമതലയാണ് ഇനി നിധിൻരാജിന്റെ കൈകളിൽ ഭദ്രമാവുക.
സംസ്ഥാനത്തെ ക്രമസമാധാന ചുമതലയുള്ള എഡിജിപിയായി പി. വിജയനെ നിയമിച്ചതാണ് പോലീസ് തലപ്പത്തെ മറ്റൊരു പ്രധാന മാറ്റം. നിലവിൽ ഈ പദവിയിലുണ്ടായിരുന്ന എച്ച്. വെങ്കടേഷിനെ മാറ്റി പകരം ക്രൈംബ്രാഞ്ച് മേധാവി സ്ഥാനം മാത്രമാണ് നൽകിയിട്ടുള്ളത്. എസ്. ശ്രീജിത്തിനെ ജയിൽ മേധാവിയായും ദിനേന്ദ്ര കശ്യപിനെ ഇന്റലിജൻസ് മേധാവിയായും നിയമിച്ചിട്ടുണ്ട്.
മലബാർ മേഖലയിൽ കമ്മീഷണർ തലത്തിലും വലിയ മാറ്റങ്ങളുണ്ട്. എ.പി. ഷൗക്കത്തലിയാണ് പുതിയ കോഴിക്കോട് സിറ്റി പോലീസ് കമ്മീഷണർ. മെറിൻ ജോസഫിനെ കോഴിക്കോട് റൂറൽ പോലീസ് മേധാവിയായും നിയമിച്ചു.
പോലീസ് ആസ്ഥാനത്തെയും മറ്റ് ജില്ലകളിലെയും പുതിയ നിയമനങ്ങൾ:
- ബൽറാം കുമാർ ഉപാധ്യായ: സായുധ പോലീസ് ബറ്റാലിയൻ എഡിജിപി
- അരുൺ ബി. കൃഷ്ണ: തിരുവനന്തപുരം സിറ്റി പോലീസ് കമ്മീഷണർ
- ആർ. നിശാന്തിനി: ഇന്റലിജൻസ് ഐജി
- ഹർഷിത അട്ടല്ലൂരി: പോലീസ് ആസ്ഥാനത്തെ ഐജി
- കെ. കാർത്തിക്: തൃശൂർ ഡിഐജി
- യതീഷ് ചന്ദ്ര: എറണാകുളം റേഞ്ച് ഡിഐജി
പുതിയ ജില്ലാ പോലീസ് മേധാവിമാർ:
- വയനാട്: എസ്. ദേവ മനോഹർ
- പാലക്കാട്: അബ്ദുൾ റാഷി എ.
- കോട്ടയം: സാബു മാത്യു
- ആലപ്പുഴ: വിഷ്ണു പ്രദീപ് ടി.കെ.
- റെയിൽവേ എസ്പി: ബി. കൃഷ്ണകുമാർ
വരും ദിവസങ്ങളിൽ തന്നെ കണ്ണൂർ സിറ്റി പോലീസ് കമ്മീഷണറായി ബി.വി. വിജയ ഭാരത് റെഡ്ഡിയും, കാസർകോട് ജില്ലാ പോലീസ് മേധാവിയായി നിധിൻരാജും ഔദ്യോഗികമായി ചുമതലയേൽക്കുമെന്നാണ് വിവരം.
Leave a Reply